Սիրիայի նախագահ Բաշար Ալ-Ասադը ստորագրել է նոր Սահմանադրության նախագիծը, որի ընդունման օգտին քվեարկել է փետրվարի 26-ին տեղի ունեցած հանրաքվեին մասնակցածների 89.4%-ը: Այս մասին հաղորդում է Սիրիայի պետական SANA գործակալությունը:
Նոր Սահմանադրության գլխավոր փոփոխությունը պաշտոնապես 8-րդ հոդվածը հանելն է, որը սահմանում էր «Բաաս» կուսակցության ղեկավար դերը: Այդ հոդվածի փոխարեն մտցվել է բոլոր կուսակցությունների իրավահավասարությունը սահմանող հոդված:
Ավելի վաղ Սիրիայի պետական հեռուստաալիքը հայտնել էր, որ նոր սահմանադրության նախագիծը չի նախատեսում արտահերթ նախագահական ընտրություններ: Բաշար Ալ-Ասադի կառավարման ժամկետը լրանում է 2014 թ.: Ընդ որում, նոր Սահմանադրութան համաձայն՝ նա կարող է ևս մեկ անգամ առաջադրել իր թեկնածությունը:
Հիշեցնենք. Սիրիայում ընդդիմության և կառավարական ուժերի միջև բախումները շարունակվում են 2011 թ. մարտից: Այդ ընթացքում, ՄԱԿ-ի վերջին տվյալներով, զոհվել է մոտ 8000 մարդ:
