WikiLeaks-ի կայքի փոխանցմամբ՝ Իսրայելն արդեն իսկ կործանել է Իրանի ողջ վերգետնյա միջուկային ենթակառույցները: Այս մասին նշված է ամերիկյան Stratfor հետախուզա-վերլուծակական կենտրոնի էլեկտրոնային գաղտնի նամակագրության մեջ:
Նամակը թվագրված է 2011 թվականի նոյեմբերի 7-ին և մեջբերում է իսրայելական հետախուզության աշխատակցի խոսքերը, ով մեկնաբանում էր այն հաղորդագրությունը, թե Իսրայելը պատրաստվում է Իրանի դեմ ռազմական օպերացիայի.
«Կարծում եմ, որ դա շեղող մանևր է: Իսրայելն արդեն իսկ մի քանի շաբաթ առաջ ոչնչացրել է Իրանի վերգետնյա միջուկային բոլոր օբյեկտները: Իրանի հետ հակամարտությունը հանդիսանում է եվրոպական երկրների դավադրության մասնիկը:
Ներկայիս «Եկե՛ք հարվածենք Իրանին» կամպանիան շրջանառության մեջ են դրել եվրոպացի առաջնորդները, որպեսզի դրանով իսկ հանրությանը շեղեն ներքին ֆինանսական խնդիրներից»:
Հիշեցնենք, որ WikiLeaks-ը հայտարարել է, թե հրապարակելու է Stratfor-ի ավելի քան 5 միլիոն նամակներ, որոնք ուղարկվել են 2004 թվականի հուլիսից մինչև 2011 թվականի դեկտեմբերն ընկած ժամանակահատվածում:
Stratfor-ի ներկայացուցիչներն արդեն իսկ հայտարարել են, որ իրենց կորսված նամակների մի մասը կարող են փոփոխել և կեղծել: Stratfor-ը հաճախ անվանում են «Ստվերային ԿՀՎ» (Կենտրոնական հետախուզական վարչություն):
