Ինչպես կիրակի օրը հայտնել են արաբական ԶԼՄ-ները` մեջբերելով Ազգային անցումային խորհրդի ղեկավար Մուստաֆա Աբդելջալիլի հայտարարությունը, Լիբիան հարևան երկրներից պահանջում է հանձնել Մուամար Քադաֆիի նախկին կողմնակիցներին, ովքեր մինչև հիմա թաքնվում են այդ պետություններում:
«Եթե այդ երկրները չհամագործակցեն այդ հարցում, ապա նրանց հարաբերությունները Լիբիայի հետ վտանգավոր կետի կհասնեն»,- ասել է ԱԱԽ-ի ղեկավարը:
Աբդելջալիլը չի հստակեցրել, թե կոնկրետ որ երկրների մասին է խոսքը` պարզաբանելով, որ «Լիբիան այս կապակցությամբ արդեն տեղեկացրել է որոշ արաբական և աֆրիկյան պետությունների»:
Աբդելջալիլի խոսքերով` Անցումային կառավարությունը և լիբիացի ժողովուրդն այդ երկրներից պահանջում են հարգել բարիդրացիական հարաբերությունները և չմիջամտել Լիբիայի ներքին գործերին:
Խոսելով դիվանագիտական հարաբերությունների խզման մասին, Աբդելջալիլը նշել է, որ եթե այդ երկրները հրաժարվեն համագործակցել Լիբիայի հետ այդ հարցում, ապա «հարաբերությունները նրանց հետ կախված կլինեն նրանց հետագա գործողություններից, բայց միայն լիբիացի ժողովուրդը վերջնական որոշում կկայացնի»:
