Շաբաթ օրը Եմենի հարավ-արևելքում՝ նախագահական պալատի հարևանությամբ, խոշոր պայթյուն է տեղի ունեցել: Ինչպես հայտնել են տեղական զինվորական իշխանությունները, պայթել է ականապատված մեքենան, որը վարել է մահապարտ ահաբեկիչը:
ИТАР-ТАСС գործակալությունը հաղորդել է 10 զոհերի մասին, իսկ ավելի ուշ Reuters գործակալությունը հայտնել է 26 զոհվածների մասին:
Իշխանության տվյալների համաձայն պայթյունի պահին պալատում ոչ ոք չի եղել:
Ահաբեկչության պատասխանատվությունն իր վրա է վերցրել «Ալ-Կաիդա» խմբավորումը, որի եմենյան ճյուղը գործում է երկրի հարավում:
Այս օրերին Եմենում տեղի է ունենում իշխանության փոփոխություն: Փետրվարի 21-ին երկրում տեղի ունեցան ընտրություններ, որոնց արդյունքում նախագահ ընտրվեց Աբդ Ռաբու Մանսուր Հադին: Շաբաթ օրը խորհրդարանի պատգամավորների առաջ տեղի է ունեցել նրա երդման արարողությունը:
Նոր նախագահն ընտրվել է երկու տարի ժամկետով, որի ընթացքում պետք է ազգային երկխոսության կոնֆերանս գումարվի` երկրում նոր քաղաքական համակարգ հաստատելու համար:
