Երեկ ԱՄՆ 9-րդ շրջանային բողոքարկման դատարանը միաձայն մերժել է գերմանական Munich Re ապահովագրական գործակալությունների դուստր ընկերությունների դեմ Հայոց ցեղասպանության ժառանգների կողմից փոխհատուցում ստանալու հարցով ներկայացված հայցը: Ինչպես հաղորդում է Associated Press-ը, դատավճռում ասվում է, որ Կալիֆոռնիայի օրենքը հակասում է ԱՄՆ արտաքին քաղաքականությանը:
Կալիֆոռնիայի օրենսդրական ժողովը Օսմանյան կայսրությունում ավելի քան 1.5 մլն հայերի սպանությունը որակել էր որպես ցեղասպանություն: Դատարանը սակայն նշել է, որ դա չի կարող ընդունվել՝ հաշվի առնելով այն հանգամանքը, որ ԱՄՆ նախագահ Բարաք Օբաման ամեն անգամ խուսափում է օգտագործել «ցեղասպանություն» բառը՝ խոսելով 1915 թ. ապրիլյան իրադարձությունների մասին:
Այս հարցով դատական գործընթացն սկսվել է 2000 թ., երբ Կալիֆոռնիայի օրենսդրական ժողովն ընդունեց օրենք, որի համաձայն՝ Ցեղասպանության զոհերի ժառանգները կարող են փոխհատուցում պահանջել ապահովագրական ընկերություններից: Օրենքը նրանց մինչև 2010 թ-ը հնարավորությւոն էր տալիս հայց ներկայացնել փոխհատուցում ստանալու համար:
Ամերիկյան New York Life և ֆրանսիական AXA ապահովագրական ընկերությունները վճարել են 37.5 մլն դոլարի փոխհատուցում, մինչդեռ գերմանական Munich Re բողոքարկել է այդ որոշում: Նա պնդում է, որ Կալիֆոռնիայի օրենսդրական ժողովը իրավասու չէ զբաղվել այդ հարցով, անգամ եթե Միացյալ Նահանգների պաշտոնական դիրքորոշումն այս հարցում փոխվի:
«Սահմանադրությունը միայն դաշնային կառավարությանն է բացառիկ հնարավորություն տալիս վարել արտասահմանյան գործերը»,- ասվում է վերաքննիչ դատարանի վճռում:
Սա արդեն երրորդ անգամ է, երբ 9-րդ շրջանային դատարանը վճիռ է կայացնում այս հարցով: Այնուամենայնիվ, երեկ կայացված վճիռը կարող է վերջնական լինել: Ցեղասպանության ժառանգների փաստաբանները նշել են, որ իրենք կփորձեն այլ միջոցներ փնտրել՝ հարցը հօգուտ հայերի լուծելու համար, ինչը, սակայն, «այնքան էլ խոստումնալից չի թվում»:
