Քաղաքական իրավիճակը կայուն և ակտիվ է: Այսօր կայացած մամուլի ասուլիսի ժամանակ քաղաքական իրավիճակը այսպես գնահատեց ՀՀԿ փոխնախագահ Գալուստ Սահակյանը:
«Ակտիվ է և կայուն, որովհետև և մամուլը, և հասարակությունը պասիվ դիրքերում չեն, ակտիվ քննարկումների մեջ են»,- հավաստիացրեց նա:
Ինչ վերաբերում է ՀՀԿ-ԲՀԿ ոչ այնքան լավ հարաբերություններին, ապա դրանք, Սահակյանի խոսքով, մտացածին խոսակցություններ են:
«Կոալիցիոն գործընկերությունը շարունակվում է: Կարծիքները, մանավանդ՝ ՀՀ նախկին արտգործնախարար Վարդան Օսկանյանինը, որ կոալիցիան արդյունավետ չի աշխատում, ընդամենը իր անձնական տեսակետն է»,- ասաց Սահակյանը:
Անդրադառնալով արտակարգ դրության մասին օրենքին` ՀՀԿ փոխնախագահը նշեց, որ իրենց կուսակցությունը դրա վերաբերյալ 20-ից ավելի առաջարկություններ է արել, և արձանագրային մասից հետո նոր քննարկումներ կլինեն:
«Օրենքը պետք է այնպիսին լինի, որ որևէ մտայնություն չլինի` ունքը սարքելու տեղն աչքն էլ հանենք: Խնդիրը վերաբերում է նաև բանակին»,- ընդգծեց պատգամավորը:
Անդրադառնալով ՀՀԿ մի շարք պատգամավորների` իրենց գործընկերների փոխարեն ԱԺ-ում օրեր առաջ քվեարկելու դեպքին` Գալուստ Սահակյանը նկատեց, որ ԱԺ նախագահը նմանօրինակ վարք դրսևորող խորհրդարանականներին պատժելու լիազորություններ չունի:
«Գալուստ Սահակյանն, այո, տեսել է, որ բոլոր խմբակցություններում էլ նման բաներ են լինում, բայց անձնավորումներ երբեք չի արել: Սա ոչ զանցանք է, ոչ հանցանք է, ոչ էլ բարոյական խնդիր, և ԱԺ-ն ինքը պետք է կարողանա իրավիճակը կարգավորել»,- նշեց նա:
Պատասխանելով լրագրողներից մեկի հարցին` հավաստի՞ են խոսակցությունները, որ կին գործարար Սիլվա Համբարձումյանը ցանկանում է անդամակցել ՀՀԿ-ին, Գալուստ Սահակյանը նկատեց. «Ոչ տեսել եմ նրան, ոչ լսել եմ, ոչ էլ բարևել եմ: Մարդիկ, տեսեք՝ կարող են քամի բարձրացնել, բայց ես դա չիմանամ կամ մոռացության տամ, ինչի համար ներողություն եմ խնդրում»:
