Չինաստանում մեծ ճգնաժամ կսկսվի, եթե կառավարությունը տնտեսական բարեփոխումներ չսկսի ՝ ուղղված, ի թիվս այլ խնդիրների, տնտեսության մեջ պետության դերի նվազեցմանը: Ինչպես գրում է The Wall Street Journal թերթը, այսպիսի եզրակացութան են հանգել Համաշխարհային բանկը և Չինաստանի կառավարական փորձագետները «Չինաստանը մինչև 2030 թ.» զեկույցում:
Զեկույցի համաձայն՝ կառավարության դերը չինական տնտեսության կարգավորման մեջ զգալիորեն աճել է վերջին 10 տարիների ընթացքում: Փաստաթղթի հեղինակները կարծում են, որ Չինաստանի տնտեսության բարօրությունը մեծապես պայմանավորված է ՀՆԱ աճով: Եթե այդ տեմպերը դանդաղեն, ճգնաժամը կտիրի երկրի ամբողջ տնտեսությանը: Բացի այդ, պետության մասնակցությունը տնտեսական աճի վրա բացասաբար է անդրադառնում:
Զեկույցի հեղինակները կարծում են, որ բյուրոկրատիան չափազանց անարդյունավետ է ղեկավարում պետական ձեռնարկությունները: Փորձագետները կոչ են արել Չինաստանի կառավարությանը խթանել մրցակցությունը և ձեռնարկատիրությունը, ինչպես նաև պետական ձեռնարկությունները հանձնել մասնավոր սեփականության:
Չինաստանի կառավատության կանխատեսումներով՝ 2012 թ. ՀՆԱ աճը կկազմի 8%, իսկ 2013-2016 թթ. Կդանդաղի՝ հասնելով 6.6%-ի: Մինչ այս 30 տարվա ընթացքում Չինաստանի տնտեսությունն աճել է տարեկան 10%-ով:
2011 թ. նոյեմբերին Չինաստանի արդյունաբերական արտադրությունը վերջին 3 տարվա ընթացքում առաջին անգամ կրճատվել է: Դա բացատրվում է ինչպես Եվրոպայի պարտքային ճգնաժամով, որը նվազեցնում է պահանջարկը չինական ապրանքների նկատմամբ, այնպես էլ Չինաստանի դրամային քաղաքականության հետևանքով ներքին սպառման կրճատմամբ:
2011 թ. երրորդ քառորդի տվյալներով՝ Չինաստանի ՀՆԱ աճը կազմել է 9.1%, ինչը վերջին երկու տարիների ամենացածր ցուցանիշն է:
