Հայտարարվել է Կաննի 64-րդ կինոփառատոնի ժյուրիի նախագահի անունը. դա հայտնի ամերիկացի դերասան Ռոբերտ դե Նիրոն է: Կինոփառատոնի կայքում տպագրված մամլո հաղորդագրությունում բերվում են նրա խոսքերը. «Գլխավորել Կաննի կինոփառատոնի ժյուրին, որը համարվում է ամենահին և ամենալավ կինոփառատոնն աշխարհում, մեծ պատիվ և եզակի հնարավորություն է ինձ համար»:
Կաննի կինոփառատոնը տեղի կունենա այս տարի մայիսի 11-22-ն ընկած ժամանակահատվածում: Ըստ ավանդույթի, ժյուրիի նախագահի անունը հայտարարվում է դեկտեմբերի վերջին կամ հունվարի սկզբին, իսկ մնացած անդամների անունները, ինչպես նաև մրցութային ծրագիրը հայտնի են դառնում փառատոնի սկսվելուց որոշ ժամանակ առաջ:
Նախորդ տարիներին ժյուրին գլխավորել են անվանի ռեժիսորներ և դերասաններ, ինչպիսիք են Ֆրից Լանգը, Ինգրիդ Բերգմանը, Սոֆի Լորենը, Ռոման Պոլանսկին: 2009 թ. նախագահում էր ֆրանսիացի դերասանուհի Իզաբել Հյուպպերը, իսկ 2010 թ.` ամերիկացի ռեժիսոր Թիմ Բերտոնը: