«ԲՄԱ-Էներգիա»-ի հետ հանդիպումից հետո «Շիրակ»-ի փորձառու պաշտպան Հովհաննես Գրիգորյանն ակումբի պաշտոնական կայքի հետ զրույցում ասաց, որ թիմը լավ հանդիպում անցկացրեց.
– Ի տարբերություն «Զակարպատիե»-ի հետ խաղի, մենք այս անգամ ավելի լավ խաղացինք, ցուցադրեցինք կոլեկտիվ խաղ: Այս թիմն ավելի ուժեղ էր, քան առաջինը: «ԲՄԱ-Էներգիա»-ի ֆուտբոլիստները ֆիզիկապես ավելի ամուր էին, սակայն կարծում եմ, որ մենք չզիջեցինք նրանց: Մեր տղաները դաշտի ամեն մի սանտիմետրում պայքարում էին: Նրանք ջանք ու եռանդ չխնայեցին այս հանդիպման ժամանակ:
– Ինչի՞ արդյունքում բաց թողեցիք առաջին գոլը:
– Առաջին գոլն անուշադրության պատճառով էր: Դա լուրջ սխալ չեմ համարում, ուղղակի փոքրիկ թերություն է, որը, համոզված եմ, որ հաջորդ հանդիպմանն արդեն չի կրկնվի:
– Դու, լինելով փորձառու պաշտպան, ի՞նչ կասես իվուարցի պաշտպանի մասին:
– Նա շատ լավ տպավորություն է թողնում: Ամեն հանդիպմանը նա ավելի լավ և հուսալի է խաղում, պաշտպանության կենտրոնում շատ լավ է համագործակցում Գևորգ Հովհաննիսյանի հետ:
– Քո կարծիքով, ինչքանո՞վ է թիմը պատրաստ գալիք երկար մրցաշրջանին:
– Կարծում եմ, որ մենք այժմ գրեթե 70 տոկոսով պատրաստ ենք, սակայն ուսումնամարզական հավաքներից հետո արդեն լիովին պատրաստ կլինենք մրցաշրջանին: Կարևորն այն է, որ մենք մարտական ենք տրամադրված:
