Հանրապետական պատգամավոր Ռաֆիկ Պետրոսյանը վստահ է, որ ապագա խորհրդարանում առաջին տեղում կրկին կհայտնվի «Հանրապետականը», երկրորդում՝ «Բարգավաճ Հայաստանը», երրորդ տեղում՝ ՀԱԿ-ը, ապա ՕԵԿ-ը: Քանի որ վերջինս համագործակցում է իշխող կուսակցությունների հետ, պատգամավորի համոզմամբ, դա կարող է հնարավորություն ստեղծել ինչ-որ չափով օգտվելու ՀՀԿ-ի և ԲՀԿ-ի իմիջից: ՀՅԴ-ն ևս ըստ հանրապետական Ռաֆիկ Պետրոսյանի՝ որպես հին կուսակցություն կհայտնվի խորհրդարանում: «Ժառանգությունն», ըստ նրա, եթե մենակ գնա ընտրությունների, չի հաղթահարի 5 տոկոսանոց շեմը, իսկ Հրազդանի ընտրություններն էլ ցույց տվեցին, որ ՀԱԿ-ը ունի ընտրազանգված»,- ասաց Ռաֆիկ Պետրոսյանը:
Անդրադառնալով Վարդան Օսկանյանի՝ ԲՀԿ շարքերն անդամագրվելուն, նա նշեց. «Գաղտնիք չէ, որ Վարդան Օսկանյանի և նախկին նախագահ Քոչարյանի վերաբերյալ խոսակցությունները կապվում են իրար հետ, և Վարդան Օսկանյանի մուտքը «Բարգավաճ Հայաստան» կուսակցություն էլի կապվում է Քոչարյանի՝ քաղաքական ասպարեզ մտնելու հանգամանքի հետ: Վարդան Օսկանյանը երեկվա երեխեն չի և եթե մտնում է որևէ կուսակցության մեջ, ու նա Քոչարյանի նախկին թիմի ամենաակտիվ անդամներից մեկն է, կնշանակի որոշակի նպատակ հետապնդում է: Հնարավոր է, որ հետագայում Քոչարյանն էլ մտնի այդ կուսակցություն: Այնպես որ, դրանք ապագային միտված քայլեր են, բայց այսօր 100 տոկոս ճիշտ մեկնաբանելը՝ դժվար է»:
Ռաֆիկ Պետրոսյանն ասուլիսի վերջում հայտնեց նաև, որ իրենք չեն պաշտպանի այն մարդկանց թեկնածությունը, որոնք օտար պետության շահեր են ներկայացնում. «Դա վերաբերում է Րաֆֆի Հովհաննիսյանին, Վարդան Օսկանյանին, որոնք կարող են շատ լավ աշխատել, բայց ՀՀ նախագահը պետք է լինի Հայաստանից, այստեղ ծնված, մեծացած, պապերի գերեզմանը Հայաստանում»:
