Ադրբեջանական ANS PRESS-ի փոխանցմամբ՝ Ադրբեջանի Միլի մեջլիսի (խորհրդարան) փոխխոսնակ Բահար Մուրադովան հայտարարել է, որ Ադրբեջանը Ֆրանսիայի Սահմանադրական խորհրդի կողմից Հայոց ցեղասպանության հերքումը քրեականացնող օրինագծի վերաբերյալ որոշում կայացնելուց հետո «բաց և կոշտ ձևով» կարտահայտի իր դիրքորոշումը ԵԱՀԿ Մինսկի խմբի կազմից Ֆրանսիայի դուրսբերման մասին.
«Մինսկի խմբի 20-ամյա ջանքերն արդյունք չեն տվել, ինչն էլ հարուցում է Ադրբեջանի մտահոգությունն ու դժգոհությունը: Վերջին իրադարձությունները լցրել են մեր համբերության բաժակը: ԵԱՀԿ Մինսկի խմբի կազմից Ֆրանսիայի դուրսբերման հարցը գտնվում է մեր օրակարգում: ԵԱՀԿ Մինսկի խմբի ձևաչափի փոփոխությունը կախված կլինի ԵԱՀԿ անդամ երկրների որոշումից: Ֆրանսիայի Սահմանադրական խորհրդի որոշումից հետո մենք բաց և կոշտ ձևով կարտահայտենք տվյալ հարցում մեր դիրքորոշումը»:
Հիշեցնենք, որ Ֆրանսիայի Սահմանադրական խորհուրդը պետք է իր որոշումը կայացնի մինչև մարտի 1-ը: