Երեքշաբթի Վոլգոգրադի իտալական «Բելաջիո» սրճարանում տեղի ունեցած պայթյունի հետևանքով վիրավորվել է ավելի քան 20 մարդ, որոնցից 5-ի վիճակը գնահատվում է ծանր: Volgograd Times-ը հրապարակել է վիրավորների անունները, Նրանց թվում կան ազգությամբ հայեր. Ղազարյան Սվետլանա Խարիտոնի (21 տարեկան), Ղազարյան Ագնեսա Ռադիկի (27 տարեկան), Պահակյան Եկատերինա Գրիգորի (35 տարեկան), Աբրոմյան Արթուր Վիլհելմի, Շահբազյան Աննա: Առաջին երկուսի վիճակը գնահատվում է ծանր:
«Ըստ որոշ տվյալների, 20 մարդ հոսպիտալացվել է, նրանցից հինգի վիճակը ծանր է: Եվս երկու մարդ աննշան վնասվածքներ են ստացել և հրաժարվել են հոսպիտալացվելուց»,- RIA-Novosti-ին հայտնել է արտակարգ իրավիճակների վարչության տարածքային ներկայացուցիչը:
«Բելաջիո» սրճարանի հրդեհի մասին լուրը ստացվել է մոտավորապես երեկոյան ժամը 10:00-ին: Հրդեհը հանգցնելու համար պահանջվել է մոտ երկու ժամ: Ըստ նախնական տվյալների՝ հրդեհի պատճառը եղել է սրճարանում գազի բալոնի պայթյունը: Դեպքի առիթով հարուցվել է քրեական գործ: