Ինչպես հաղորդում է չինական Xinhua գործակալությունը, Հունաստանի կառավարությունը որոշել է Թուրքիայի հետ սահմանի երկայնքով կառուցել 12,5-կիլոմետրանոց պատ: Չնայած Եվրամիությունը դեմ է հունական կառավարության այս քայլերին, Հունաստանը հայտարարել է, որ ստիպված է գնում այդ քայլին, որպեսզի կանխի անօրինական ներթափանցումներն այդ երկրից:
Սակայն հայտարարություններից, որոնք հնչել են Բրյուսելից և Աթենքից, կարելի է եզրակացնել, որ ԵՄ-Հունաստան առճակատումն այս հարցով դեռ լուծված չէ: Արդարադատության, ազատության և անվտանգության հարցերով ԵՄ հանձնակատար Սեսիլիա Մալստրոմի խոսնակը հայտարարել է, որ Հունաստանի ձեռնարկած այս քայլը կունենա կարճաժամկետ հաջողություն, սակայն խնդիրը չի լուծի:
Հունաստանի քաղաքացիական պաշտպանության նախարար Քրիստոս Պապուտիսն էլ իր հերթին ասել է, թե մի ժամանակ Հունաստանին մեղադրում էին, որ չի պաշտպանում Շենգենի տարածքի սահմանները, սակայն երբ հիմա սկսել են դա անել, իրենց մեղադրում են վերահսկողությունը մեծացնելու համար: Նախարարը նաև ավելացրել է, որ անցած տարվա ընթացքում կանխվել է մոտ 128 հազար թուրք անօրինական ներգաղթյալների մուտքը երկիր, միևնույն ժամանակ անցած 4 տարիներին մոտ կես միլիոն մարդ անօրինական հատել է սահմանը: Այս պահին թուրք-հունական սահմանը հիմնական տեղն է, որտեղից թուրք ներգաղթյալները ներխուժում են ԵՄ: