ԱՄՆ պետքարտուղար Հիլարի Քլինթոնը, որպես երկրի բարձրաստիճան դիվանագետ, շատ հաճախ հանդիպումներ է ունենում տարբեր երկրների արտգործնախարարների հետ, բայց այսօր տեղի ունեցած հանդիպումը նրա և Իսրայելի արտգործնախարար Ավիգդոր Լիբերմանի միջև, հազվագյուտ իրադարձություն էր: Դա նրանց առաջին դեմ առ դեմ հանդիպումն էր վերջին մեկ տարվա ընթացքում:
Լիբերմանի այցելությունը Վաշինգտոն նրա միայն երկրորդ այցն է այն ժամանակից ի վեր, երբ նա երեք տարի առաջ դարձել էր Իսրայելի արտգործնախարար: Նրանք վերջին անգամ հանդիպել էին 2010 թվականի սեպտեմբերին՝ Երուսաղեմում:
The Envoy-ը գրում է, որ երկու քաղաքական գործիչների միջև նման «սառնությունը» բացատրվում է Լիբերմանի քաղաքական հայացքներով ու նրա և Իսրայելի վարչապետի միջև երբեմն տեղի ունեցող տարաձայնություններով:
Այժմ, սակայն, երբ Իսրայելի և Պաղեստինի միջև խաղաղության ինչ-որ բանակցություններ են ընթանում, Քլինթոնն ասել է, որ պատճառ չկա արտգործնախարարի հետ չհանդիպելու, չնայած որ չի կարծում, որ նման դիվանագիտական հանդիպումներից կարելի է շատ բան սպասել:
