Է.Նալբանդյանը 2010 թվականի հիշարժան իրադարձություններն է նշում

ՀՀ ԱԳ նախարար Էդվարդ Նալբանդյանը երեկ Հանրային հեռուստատեսության «Իրական քաղաքակականություն» հաղորդաշարին տված հարցազրույցում անդրադառնալով 2010 թվականի հիշարժան իրադարձություններին արտաքին քաղաքական ոլորտում` առանձնացրել է. «Լեռնային Ղարաբաղի հիմնախնդրի կարգավորման առումով միջազգային հանրության համար առավել ակնհայտ դարձան Հայաստանի կառուցողական և Ադրբեջանի ապակառուցողական դիրքորոշումները: 2010 թվականին էր, որ Ռուսաստանի նախագահ Դմիտրի Մեդվեդևը այցելեց Հայաստան, դա Ռուսաստանի նախագահի առաջին պետական այցելությունն էր Հայաստան: Այն պայմանավորվածությունները, որոնք ձեռք բերվեցին Հայաստանի և Ռուսաստանի նախագահների միջև կարևոր են ոչ միայն հայ-ռուսական ռազմավարական, դաշնակցային հարաբերությունների իմաստով, այլ կարևոր էր նաև Հայաստանի անվտանգության ապահովման և Հայաստանի տնտեսական զարգացման առումով: Բավական երկարատև ընդմիջումից հետո Հայաստանի Հանրապետության նախագահը 2010 թվականին այցելեց Վաշինգտոնում և հանդիպում ունեցավ նախագահ Բարաք Օբամայի հետ: Իսկ ԱՄՆ պետքարտուղար Հիլարի Քլինթոնը Հայաստան այցելեց և Երևանում անցկացրեց Միացյալ Նահանգների ազգային տոնը:
2010 թվականին էր, որ մենք մեկնարկեցինք բանակցությունները Եվրոպական Միության հետ ասոցիացման համաձայնագրի կնքման վերաբերյալ: 2010 թվականին էր, որ ՀԱՊԿ-ի վեց անդամ երկրների նախագահները հանդիպեցին Երևանում և Սևանում և կարևորագույն որոշումներ ընդունեցին: 2010 թվականին էր, որ Թուրքիան ուժ չգտավ իր մեջ հարգելու այն պայմանավորվածությունները, որոնք ձեռք էին բերվել Հայաստանի հետ և հանդես եկավ աշխարհի, միջազգային հանրության առջև որպես անվստահելի գործընկեր, ի տարբերություն Հայաստանի: 2010 թվականին էր, որ չնայած հայտնի դժվարությունների, Հայաստանը հիմնեց 7 նոր դեսպանություն»: