1988թ. աղետալի երկրաշարժի հետևանքով բնակարան կորցրած 43 ընտանիքներ այսօր Ստեփանավանի քաղաքապետարանում վարչապետ Տիգրան Սարգսյանից ստացան իրենց նոր բնակարանների հավաստագրերը։ Նրանց 1, 2, 3 և 4-սենյականոց բնակարաններ են հատկացվել Ստեփանավանի Ձախափնյա թաղամասի նորակառույց բազմաբնակարան շենքերում։
Վարչապետ Սարգսյանը նշել է, որ ՀՀ նախագահ Սերժ Սարգսյանի նախընտրական ծրագրային դրույթները աղետի գոտու մասով հաջողությամբ է իրականացվում։ «Նախընտրական ծրագիրը` աղետի գոտու բոլոր անօթևաններին ապահովել բնակարաններով, հաջողությամբ է իրականացվում։ Չնայած համաշխարհային տնտեսական ճգնաժամի ազդեցությանը, մենք շարունակեցինք բնակարանաշինությունը, և արեցինք հնարավորինս առավելագույնը ժամանակին բնակարանները բնակիչներին տրամադրելու համար»,- շեշտել է կառավարության ղեկավարը` ավելացնելով, որ բնակարան ստացողների ցուցակները ճշտված են, և նախանշված ժամանակահատվածում պետությունը բոլորի նկատմամբ կկատարի իր կողմից ստանձնած պարտականությունները։
Բնակարանամուտին վարչապետը երկու ընտանիքների նվիրել է համակարգիչ, իսկ երկու այլ ընտանիքների՝ հեռուստացույց։
Բազմաբնակարան այդ շենքերը երկրաշարժից հետո սկսել էին կառուցել ռուս շինարարները, սակայն շինարարությունը կիսատ էր մնացել։ 2009թ. նոյեմբերին համայնքային սեփականություն հանդիսացող այս կիսակառույց շենքերը հատկացվեցին պետությանը, և պետբյուջեի միջոցներով շարունակվեցին կիսակառույցների ամրացման և շինարարական հետագա աշխատանքները։
Վարչապետ Տիգրան Սարգսյանի հաջորդ կանգառը Ստեփանավանի Վահան Թեքեյանի թիվ 6 միջնակարգ դպրոցն էր, որտեղ «Լինսի»-ի հիմնադրամի միջոցներով կառուցվում է նոր մասնաշենք, որտեղ լինելու է մարզադահլիճ և հանդիսությունների սրահ։ Վարչապետը տեղում ծանոթացել է շինարարական աշխատանքների ընթացքին։
