Կոլումբիայի Տումայկո քաղաքի ոստիկանական բաժանմունքում տեղի ունեցած պայթյունի հետևանքով զոհվել է յոթ մարդ, վիրավորվել՝ մոտ 70-ը: Նախնական տվյալներով՝ պայթյունը լավ կազմակերպված ահաբեկչություն էր: Այս մասին հայտնում է BBC-ն:
Ոստիկանական բաժանմունքին է մոտեցել մոտոցիկլետ` բեռնված պայթուցիկ նյութերով, որի պատճառով էլ տեղի է ունեցել ուժեղ պայթյուն: Այն գրեթե ամբողջությամբ ոչնչացրել է շենքը:
Տեղի իշխանությունները ենթադրում են, որ ահաբեկչության կազմակերպիչները «Կոլումբիայի հեղափոխական զինված ուժեր» (FARC) ահաբեկչական խմբավորման անդամներն են:
Նշենք, որ սա առաջին աղմուկ հանած հանցագործությունը չէ, որը իրականացվել է նշված կազմակերպության կողմից: 2011 թվականի նոյմեբերին Կոլումբիայի իշխանություններին հաջողվել է ոչնչացնել FARC-ի առաջնորդ Ալֆոնսո Կանոյին, որից հետո ահաբեկիչները ակտիվացել են. մի քանի շաբաթ անց նրանք սպանել են չորս պատանդի, որոնք գերության մեջ էին գտնվում մի քանի տարի, այնուհետև հարձակվել էին ոստիկանական բաժանմունքի վրա:
