Այսօրվանից մեկնարկում է «Ես գիտեմ» հանրային իրազեկման արշավը, որն իրականացվում է «Ամերիա» խորհրդատվական ընկերության կողմից: Ծրագրի իրականացման համար Համաշխարհային բանկը հատկացրել է շուրջ 100 հազար դոլար:
Այսօր լրագրողների հետ հանդիպման ժամանակ «Ամերիա» ընկերությունների խմբի զարգացման գծով տնօրեն Տիգրան Ջրբաշյանը հայտնեց՝ հաշվի առնելով, որ վերջին տարիներին իրականացվել են բարեփոխումներ, խնդիր է դարձել այն, որ հանրությունը այնքան էլ տեղյակ չէ այդ փոփոխություններին և կարիք կա իրազեկման:
«Սկսվելու է գովազդային արշավ և՛ հեռուստատեսությամբ, և՛ ռադիոյով, և՛ համացանցով՝ ներկայացնելու այն բարեփոխումները, որ իրականացրել է կառավարությունը: Կան նաև մի շարք այլ միջոցառումներ, որոնք անակնկալ կմատուցվեն»,- ասաց Տ. Ջրբաշյանը:
Ծրագիրն իրականացվելու է Դատաիրավական բարեփոխումների ծրագրի շրջանակներում: Երկրորդ ծրագրի խմբի ղեկավար Դավիթ Մելիքյանը նշեց՝ նպատակն այն է, որ քաղաքացին իրազեկված լինի գործող համակարգերի ընձեռած հնարավորությունների մասին, որպեսզի օգտագործելով վեճերի լուծման դատական և արտադատարանային համակարգերը՝ կարողանա արդյունավետորեն պաշտպանել սեփական շահերը:
Տ. Ջրբաշյանը հայտնեց, որ արշավի մեկ ամսվա շրջանակներում քաղաքացիներին մանրամասն տեղեկություններ կտրամադրվեն կառավարության թեժ գծով` 527 000 հեռախոսահամարով:
