Haber Türk-ի փոխանցմամբ՝ Թուրքիայի արտգործնախարար Ահմեդ Դավութօղլուն և պաշտպանության նախարար Իսմեթ Յըլմազը հայտարարել են, որ Ինջիրլիքի ռազմաբազայում գտնվող ամերիկյան Predator տիպի 4 անօդաչու հետախուզական ինքնաթիռներն ավճար ծառայում են Թուրքիային։
Այս հարցը Թուրքիայի խորհրդարանում բարձրացրել էին ընդդիմադիր «Ազգայնական շարժում» կուսակցության (ԱՇԿ) պատգամավորները, որոնց հետաքրքրում է Predator-ների գործունեությունը։ Այս կապակցությամբ Ահմեդ Դավութօղլուն և Իսմեթ Յըլմազը հայտարարություն են ուղարկել խորհրդարանին, որում վերջակետ են դրել այդ թեմային։
Նրանք երկուսն էլ հայտարարել են, որ այդ ինքնաթիռներին հետևում են ռադարները, իսկ դրանցից ստացված տվյալները փոխանցվում են թուրքական կողմին։ Նրանք հավելել են, որ թուրքական կողմն է որոշում, թե Predator-ները Հյուսիսային Իրաքի որ շրջաններում իրականացնեն օպերացիաներ։
