ՀԴՄ կտրոններով բոնուսների խաղարկությանը մասնակցող քաղաքացիներից չեն վերցնում «Nathali Pharm» դեղատների կողմից տրամադրված ՀԴՄ կտրոնները: Մեզ դիմած քաղաքացիները նշեցին, որ ի սկզբանե բոնուսները տրամադրող կազմակերպությունների աշխատակիցներն ասում են, որ իրենց կտրոններից հանեն «Nathali Pharm»-ի ՀԴՄ կտրոնները: ՊԵԿ գլխավոր հարկային տեսուչ Կարեն Մովսիսյանը մեզ տեղեկացրեց, որ եղել են անձինք, ովքեր բոնուսներ ստանալու համար ամբողջ խմբաքանակով ներկայացրել են «Nathali Pharm»-ի ՀԴՄ կտրոններ, իսկ կառավարության 1330Ն որոշման մեջ նշված է, որ ՀԴՄ կտրոն պետք է ներկայացնի անձը, որն անձամբ է գնումներ կատարել. «Այս պարագայում ստացվում է, որ տվյալ անձը ամբողջ եռամսյակում իր կյանքն անցկացրել է «Nathali Pharm»-ում և սնվել է դեղերով: Մենք արգելել ենք այդ դեպքում բոնուս տրամադրել»:
Մովսիսյանը նշեց, որ այլ ՀԴՄ կտրոնի հետ «Nathali Pharm»-ի կտրոն ներկայացնելը պետք է խնդիր չառաջացնի: Նշենք, որ ՀԴՄ կտրոնների դիմաց բոնուսները տրամադրում են «Հայփոստը» և «Արարատ» բանկը: Մովսիսյանը խորհուրդ տվեց դիմել հենց այդ կառույցների ղեկավարությանը:
«Հայփոստի» փոստային գործառույթների կարգավորման բաժնի պետ Սևադա Բադալյանն էլ իր հերթին խորհուրդ տվեց դիմել ՊԵԿ-ին, քանզի իրենք հենց այնտեղից են հրահանգ ստացել, որ բոնուս չտրամադրեն այն դեպքում, երբ մեկ ՀԴՄ կտրոնի վրա գրանցված գումարը գերազանցում է 1մլն դրամը: Բադալյանը փոխանցեց, որ հիմնականում այդ հրահանգը վերաբերվում է դեղատների տրամադրած ՀԴՄ կտրոններին: Իսկ նման կտրոնները, Բադալյանի խոսքերով, չափազանց շատ են:
Տեղեկացնենք, որ «Nathali Pharm» դեղատների ցանցը պատկանում է ԱԺ պատգամավոր Սամվել Ալեքսանյանին:
Մեծ հակասություններ առաջացրած կապույտ և նարնջագույն ՀԴՄ կտրոնների առնչությամբ ՊԵԿ գլխավոր հարկային տեսուչ Կարեն Մովսիսյանը պարզաբանեց, որ կապույտ կտրոնները չեն կարող մասնակցել բոնուսային խաղարկությանը, քանզի, կառավարության որոշմամբ, կապույտ ՀԴՄ կտրոն տրամադրում են հաստատագրված դաշտում աշխատող կազմակերպությունները: Մովսիսյանը տեղեկացրեց, որ 4-րդ եռամսյակից բոնուսներ այլևս չեն տրամադրվելու, այդ ժամանակ խաղարկվելու են մեքենաներ և խաղարկությանը մասնակցելու են նաև կապույտ ՀԴՄ կտրոնները:
