Ինչպես հայտնում է Daily Mirror գործակալությունը, Մեծ Բրիտանիայի արքայազն Հարրին կանցնի Apache ուղղաթիռների կառավարման հատուկ փուլ, որպեսզի, ամենայն հավանականությամբ, 2012 թվին ծառայության մեկնի Աֆղանստան:
Գործակալության տվյալներով, 26-ամյա արքայազնը հիմա անցնում է թռիչքային ընդհանուր պատրաստություն և այն կվերջացնի մարտին Շոտլանդիայի լեռնային Կերնգորմ շրջանում, որը նման է Աֆղանստանի բնական պայմաններին: Բրիտանական պաշտպանական կառույցի մասնագետի կարծիքով, լեռնային շրջաններում թռիչքները թույլ են տալիս օդաչուներին «ձեռք բերել անծանոթ շրջաններում թռչելու փորձառություն»,- գրում է բրիտանական թերթը:
Ինչպես հայտնել է սպան, Հարրին ամեն օր 4 անգամ 2 ժամ տևողությամբ թռիչք կկատարի: Երկուսը կլինեն գիշերային: Ինչպես հայտնում է ИТАР-ТАСС գործակալությունը, այս փուլից հետո նա կանցնի վերջնական, 8-ամսյա պատրաստության շրջան Արևելյան Անգլիայի ՌԱՈՒ Ուետիշեմ ռազմաբազայում:
Հիշեցնենք, որ Հարրին, որը հորից և եղբորից հետո գահին բազմելու թեկնածուներից երրորդն է, 2007թ. 10 ամիս արդեն ծառայել է Աֆղանստանի Գիլմենդ քաղաքում որպես ռազմական օդաչու: Նրա գտնվելն այդ երկրում պատված էր գաղտնիության շղարշով: Բրիտանական ԶԼՄ-ները և պաշտպանության նախարարությունը համաձայնության էին եկել չհրապարակել այդ լուրը:
Այն բանից հետո, երբ 2008թ. փետրվարին որոշ լրատվական միջոցներ հայտնեցին այդ լուրը, ՊՆ-ը որոշեց տուն ուղարկել նրան, քանի որ կարող էր դառնալ թալիբների հարձակման թիրախ, ինչպես նաև վտանգի տակ դներ իր հետ ծառայողներին:
Ինչպես հայտնում էին ԶԼՄ-ները, Հարրին դժգոհ էր այդ որոշումից, սակայն չէր կարող չենթարկվել հրամանին: Այս տարի ԶԼՄ-ները հայտնում են, որ Հարրին ցանկություն է հայտնել ծառայել Աֆղանստանում որպես ուղղաթիռի օդաչու: Հարրին դարձավ առաջին արքայորդին վերջին 26 տարվա ընթացքում, որը մասնակցում է ռազմական գործողությունների:
