ԼՂՀ նախագահի մամլո քարտուղար Դավիթ Բաբայանը դրական է գնահատում Հայաստանի, Ռուսաստանի ու Ադրբեջանի նախագահների՝ այսօր Սոչիում կայացած եռակողմ հանդիպումը և նրանց համատեղ հայտարարությունը: Այս մասին նա ասաց «Առաջին լրատվական»-ի հետ զրույցում:
«Ցանկացած նման հանդիպում պետք է դրական գնահատել, քանի որ դրանք, անկասկած, նպաստում են տարածաշրջանային կայունության պահպանմանը: Այլ հարց է, որ ԼՂ հակամարտության շուտափույթ կարգավորում պետք չէ ակնկալել: Բայց խնդրին անհրաժեշտ է այլ տեսանկյունից մոտենալ. հակամարտությունն ինքնին արդեն իսկ կարգավորված է: Սա էլ է կարգավորման տարբերակ, ուղղակի հակամարտող կողմերից մեկը՝ Ադրբեջանը, չի ընդունում այս տարբերակը՝ փորձելով ինչ-որ կերպ փոխել այն: Նման մոտեցումն, իհարկե, հղի է անկանխատեսելի հետևանքներով»,- նկատեց Բաբայանը:
Անդրադառնալով Սոչիում երեք երկրների նախագահների ընդունած համատեղ հայտարարության այն հատվածին, ուր ասվում է, որ նախագահներն ի գիտություն ընդունեցին համանախագահների եւ ԵԱՀԿ գործող նախագահի անձնական ներկայացուցչի՝ շփման գծի երկայնքով միջադեպերի հետաքննության անցկացման մեխանիզմի վերաբերյալ համատեղ մշակած զեկույցը և հանձնարարեցին շարունակել այդ աշխատանքը՝ Դավիթ Բաբայանը ասաց, որ Ադրբեջանը դժվար թե հավատարիմ մնա սահմանին հրադադարի ռեժիմի պահպանման պարտականությանը: «Այս առնչությամբ լուրջ կասկածանքներ ունեմ: Շփման գծում հրադադարի ռեժմի խախտման դեպքերն Ադրբեջանի թե՛ ներքին, թե՛ արտաքին կարևորագույն ուղղություններից են: Տարիներ շարունակ այդ երկիրն ավելացնում է իր ռազմական բյուջեն: Թեպետ կասկածում եմ, որ Ադրբեջանը կհարգի այս կետը, այնուամենայնիվ, դրական եմ համարում, որ հայտարարության մեջ դրա մասին մեկ անգամ ևս շեշտվել է»,- ամփոփեց Դավիթ Բաբայանը:
Նշենք, որ Սոչիում այսօր կայացած Սարգսյան-Մեդվեդև-Ալիև հանդիպումից հետո համատեղ հայտարարություն է ընդունվել: Երեք երկրների ղեկավարներն ընդգծել են ԼՂ հակամարտության կարգավորման ուղղությամբ իրականացված աշխատանքի մեծ ծավալը՝ սկսած 2008 թ. նոյեմբերի 2-ի նրանց հանդիպումից, երբ ընդունվեց Մոսկովյան հռչակագիրը: Նախագահները հայտարարել են, որ ինտենսիվ բանակցությունների արդյունքում առաջընթաց է ձեռք բերվել ԼՂ կարգավորման Հիմնարար սկզբունքների համաձայնեցման շուրջ: