Ինչպես երևում է, զինված ուժերում տիրող իրավիճակներին անդրադարձող և լրատվական միջոցներում խաղաղ պայմաններում զոհված զինվորների մահվան հանգամանքները բացահայտելու միտում ունեցող լրագրողները կա՛մ պետք է հարմարվեն այն մտքի հետ, որ շաբաթը մի քանի անգամ քննչական բաժիններում են լինելու, կա՛մ էլ պետք է մոռանան ազատ խոսքի մասին:
Բանն այն է, որ զինդատախազ Գևորգ Կոստանյանը, ինչպես ինքն այսօր նշեց լրագրողների հետ հանդիպմանը, արդեն հատուկ ցուցում է տվել համապատասխան դատախազներին, Հատուկ քննչական ծառայության պետ Արմեն Հարությունյանն էլ քննիչներին, հանցագործության առնչությամբ ցանկացած տեղեկատվության տարածման հետ տեղեկատվություն տարածողին հրավիրել քննչական բաժին, գործի հանգամանքների վերաբերյալ իր ունեցած տեղեկատվության վերաբերյալ պարզաբանումներ, բացատրություններ, տեղեկություններ հայտնելու համար:
«Մենք ականատես ենք եղել բազմաթիվ այնպիսի դեպքերի, երբ տարածվել է այնպիսի տեղեկատվություն, որը ոչ միայն բացարձակ ապատեղեկատվություն է, այլև շատ դեպքերում այդ տեղեկատվությունը բավական լայն արձագանք է ստանում և հասարակության մեջ ընկալվում որպես տեղի ունեցած փաստ: Ես ուզում եմ ևս մեկ անգամ բոլորին հիշեցնել, որ տեղեկատվության ձեռքբերման, տարածման ազատությունը միանաշանակ երաշխավորված է, բայց այդ նույն տեղեկատվությունը պետք է տարածվի պատշաճ հիմնավորվածությամբ, լրագրողական գործունեության արդյունքում այդ տեղեկատվությունը ստուգելուն ուղղված բոլոր ողջամիտ գործողությունները պետք է կատարված լինեն»,- նշեց զինվորական դատախազ Գևորգ Կոստանյանը:
Նրա խոսքով` լրագրողի կողմից ևս կարող են հայտնի դառնալ այնպիսի հանգամանքներ, որոնք նախաքննության ընթացքում կա՛մ դեռ ձեռք չեն բերվել, կա՛մ գտնվում են ստուգման փուլում, ու կօգնեն հանցագործության բացահայտմանը: Սակայն լրագրողները, Գ.Կոստանյանի կարծիքով, այնքան էլ պատրաստակամ չեն իրենց հասու տեղեկատվությունը նախաքննության մարմիններին փոխանցելու հարցում:
«Բացարձակ օրինաչափություն ենք նկատել. բազմաթիվ լրագրողներ արդեն իսկ հրավիրվել են, բայց լրագրողները շատ բացարձակ իմաստով են ընկալել տեղեկատվություն չտրամադրելու իրենց իրավունքը: Ի՞նչ է, լրագրողները չե՞ն ուզում աջակցել արդար դատավարության իրականացման գործընթացին»,- ասաց զինդատախազը` ևս մեկ անգամ հիշեցնելով, որ Զանգվածային լրատվության մասին օրենքով, քրեական գործերի շահերից և արդարադատության իրականացման շահերից ելնելով, դատարանի որոշմամբ լրագրողը հարկ եղած դեպքում պարտավոր է բացահայտել իր տեղեկատվության աղբյուրը: