Իտալական «Կոստա Կոնկորդիա» շոգենավը բախվել է խութին, երբ նավի կապիտան Ֆրանչեսկո Սկետինոն որոշել է նավը մոտեցնել ափին և ողջունել Ջիլիո կղզում գտնվող իր ընկերոջը:
Ինչպես հաղորդում է բրիտանական The Daily Telegraph պարբերականը, այսպիսի եզրակացություն է արվել հետաքննության արդյունքում: Բրիտանական մեկ այլ թերթ՝ The Daily Mail-ը, գրում է, որ նավաբեկության ժամանակ, իրոք, Ջիլիո կղզում էր գտնվում կապիտանի ընկերներից մեկը:
52-ամյա Սկետինոյի գործողությունները Իտալիայի դատախազները որակել են անպատասխանատու և անփույթ: Նավի սեփականատեր Costa Crociere ընկերությունը The Daily Telegraph-ին հաստատել է, որ նավաբեկության պատճառը, ըստ ամենայնի, մարդկային գործոնն է: Ընդ որում՝ ընկերությունում նշել են, որ նախքան կապիտան նշանակվելը, Սկետինոն նավերի անվտանգության պատասխանատու է աշխատել:
Ավելի վաղ Սկետինոն հայտարարել էր, որ նավը բախվել է խութի, որը քարտեզի վրա նշված չի եղել: Costa Crociere ընկերությունը նշել է, որ բախման ժամանակ շոգենավը չի շեղվել նշանակված ուղուց: Դատախազությունը Սկետինոյին մեղադրում է անփութության պատճառով մարդկային զոհերի պատճառ դառնալու և մինչև ուղևորների վերջնական տարհանումը դեպքի վայրից փախչելու համար:
Վերջին տեղեկությունների համաձայն՝ հունվարի 14-ի գիշերը «Կոստա Կոնկորդիա» շոգենավի նավաբեկության հետևանքով զոհվել է 6 մարդ, 16-ը համարվում են անհետ կորած: Ընդհանուր առմամբ նավի վրա եղել է ավելի քան 4200 մարդ, նրանցից 60-ը ստացել են տարբեր աստիճանի վնասվածքներ:
