Թուրքական Ihlas լրատվական գործակալությանը տված հարցազրույցի ժամանակ Ադրբեջանի նախկին նախագահ Այազ Մութալիբովն անդրադարձել է 1990 թվականի հունվարի 20-ին խորհրդային բանակի զորամասերի՝ Բաքու մտնելուն.
«Նախկին ԽՍՀՄ-ի ղեկավարությունը մեղավոր է այդ իրադարձություններում, որոնց զոհ գնացին հարյուրավոր խաղաղ բնակիչներ։ Խորհրդային զինվորականների գործողությունները մարդկության դեմ ուղղված հանցանք էին։
ԽՍՀՄ-ի ղեկավարությունը հրահրում էր էթնիկ հակամարտություններ, որպեսզի կարողանար իր ձեռքում պահեր երկրի ղեկավարման թելը։ Ղարաբաղյան հակամարտությունն ամբողջովին Մոսկվայի կողմից պատրաստված սցենար էր։
Մոսկվան կարող էր ձեռքի մեկ շարժումով վերջ տալ այդ խնդրին և հայերին դնել իրենց տեղը։ Սակայն դրա փոխարեն նա սարսափելի հանցագործություն գործեց մեր ժողովրդի դեմ։ Բնականաբար, այդ իրադարձություններում մեղքի իր բաժինն ունի նաև Ադրբեջանի Ժողովրդական ճակատը։
Հունվարի 20-ի իրադարձությունների ժամանակ Ադրբեջանը պետքական աջակցություն չստացավ հարևան մուսուլմանական երկրներից (ամենայն հավանականությամբ՝ նկատի են առնվում Թուրքիան և Իրանը)։ Մինչդեռ հայերին ակնհայտ աջակցություն էին ցուցաբերում այնպիսի երկրներ, ինչպիսիք են Ռուսաստանն ու Ֆրանսիան։ Ոչ ոք չգիտեր, թե աշխարհի քարտեզի վրա որտեղ էր գտնվում Ադրբեջանը, մեզ սկսեցին ճանաչել մեր նավթի ու բնական գազի շնորհիվ»։
Հիշեցնենք, որ Լեռնային Ղարաբաղում ադրբեջանական բանակի մի շարք անհաջողություններից և Ադրբեջանի ժողովրդական ճակատի ճնշումներից հետո Մութալիբովը հրաժարական տվեց 1992 թվականի մարտի 6-ին։ Դրանից հետո նա քաղաքական ապաստան գտավ Ռուսաստանում, իսկ Ադրբեջանում նրա դեմ հարուցեցին քրեական գործ։ Սակայն ռուսական կողմը հրաժարվեց նրան հանձնել Ադրբեջանին։
2011 թվականի օգոստոսի 8-ին Մութալիբովը 19-ամյա ընդմիջումից հետո վերադարձավ Ադրբեջան՝ մասնակցելու համար իր ավագ որդու թաղման արարողությանը և մնաց այնտեղ։ Ապա Ադրբեջանի խորհրդարանն ընդունեց նախկին նախագահներին անձեռնմխելիություն շնորհող օրինագիծը։
