Ֆրանսիայում քվեարկվելիք Ցեղասպանության ժխտման դեմ օրինագիծը Թուրքիային կգցի բավական ծանր իրավիճակի մեջ: «Առաջին լրատվական»-ի հետ զրույցում նման տեսակետ հայտնեց Հայ-շվեյցարական ընկերության պատվո նախագահ Սարգիս Շահինյանը` խոսելով 2012 թ. սփյուռքի առաջնահերթություններից, որոնցից մեկն, ըստ նրա, Ֆրանսիայում քվեարկվելիք Ցեղասպանության ժխտումը քրեականացնող օրինագիծն է:
Նրա կարծիքով` այս օրինագծի ընդունմամբ Թուրքիայի և՛ ներքին, և՛ արտաքին քաղաքականությունը կհայտնվի ծանր իրավիճակում: «Չկարծենք նաև, որ Նիկոլա Սարկոզին դարձել է դեպի Հայոց ցեղասպանությունը, պարզապես համընկնում են Ֆրանսիա-Միջին Արևելք և եվրասիական ընդհանուր ռազմավարական շահերը: Հայերին մնում է լավագույնը քաղել այս ամենից՝ մշակելով հստակ քաղաքական հեռանկար, քիչ խոսելով և լարված գործելով»,- մեկնաբանեց Ս. Շահինյանը:
Հաջորդ կարևոր առաջնահերթությունը նա համարում է ԱՄՆ նախագահ Բարաք Օբամայի երկրորդ մանդատ ստանալու կարևորությունը: Ըստ նրա` թուրքական ժխտողականությունը հաղթահարելու համար մենք պետք է կարողանանք օգտվել հակառակորդի սխալներից, որոնք շատ են և ավելանալու են: Բայց, նրա համոզմամբ, դա կարող ենք անել միայն այն դեպքում, երբ հասկանանք, թե որ ուղղությամբ ենք ցանկանում գնալ: Սարգիս Շահինյանը նաև կարծում է, որ սփյուռքը և Հայաստանը պետք է շարժվեն նույն ուղղությամբ, ոչ զուգահեռ կամ հակառակ:
Անդրադառնալով Հայ Առաքելական եկեղեցու դերին`նա ասաց, որ սփյուռքը հստակ պատկերացում պետք է ունենա, թե ինչպիսին են հարաբերությունները իր և Հայ Առաքելական եկեղեցու միջև: «Մեր կրոնական ղեկավարությունը պետք է կարողանա արդիական խնդիրներին խելամիտ պատասխան տալ: Նա պետք է սկսի քույր եկեղեցիների հետ ոչ միայն հանդուրժողականությամբ, այլև նեղ համագործակցությամբ աշխատել»,- մեկնաբանեց Սարգիս Շահինյանը` հավելելով, որ հայը հզոր է քրիստոնեական հավաքականությամբ: Նրա համոզմամբ` այս առաջնահերթությունները կյանքի կկոչվեն այն դեպքում, երբ Հայաստանը դառնա իրապես օրենսդրական երկիր:
