Արհմիությունները, որոնք միավորում են Iberia իսպանական ավիաընկերության մոտ 20 հազար աշխատակցի, փետրվարին սկսելու են անժամկետ գործադուլ: Այս մասին հայտնում է Cinco Dias-ը:
Գործադուլը պլանավորվում է սկսել փետրվարի 3-ին: Բողոքի ակցիաները կազմակերպվելու են ամեն ուրբաթ և երկուշաբթի, մինչև գործատուները կատարեն անձնակազմի պահանջները: Iberia-ի գլխավոր տնօրեն Ռաֆայել Սանչես Լոսանոն ասել է, որ աշխատակիցների հետ բանակցությունները փակուղի են մտել:
Iberia-ի աշխատակիցները արդեն գործադուլ են արել դեկտեմբերի 18-ին և 29-ին, ինչպես նաև հունվարի 9-ին և 11-ին: Գործադուլի պատճառով չեղյալ է հայտարարվել մոտ 420 չվերթ, որի հետևանքով տուժել է 55 հազար մարդ:
Ավիաընկերության անձնակազմը բողոքում է Iberia-ի հիման վրա, ցածր բյուջե ունեցող փոխադրողի՝ Iberia Express-ի ստեղծման դեմ: Դրա հետևանքով չվերթների մի մասը փոխանցվելու է նոր ընկերությանը: Ավիաընկերության սեփականատերը, որին պատկանում է նաև British Airways-ը և International Airlines Group (IAG)-ը, վստահեցնում է, որ նոր ընկերության ստեղծումը չի անդրադառնա արդեն գոյություն ունեցող ընկերության աշխատակիցների աշխատանքի վրա: Վերջիններս գտնում են, որ Iberia Express-ի ստեղծումը հանգեցնելու է անձնակազմի և աշխատավարձերի կրճատման:
Iberia Express-ի առաջին թռիչքը սպասվում է այս տարվա ամռանը: Նախապես ուղևորափոխադրողն ունենալու է չորս ինքնաթիռ, իսկ մինչև տարվա վերջ համալրվելու է ևս 9-ով:
