Քաղաքական և միջազգային հետազոտությունների հայկական կենտրոնը (ՔՄՀՀԿ) այսօր, ԱՄՆ ժողովրդավարական ինստիտուտի հետ համատեղ, կազմակերպել է քաղաքական քննարկում ՀՀ կուսակցությունների 2012 թ. տնտեսական օրակարգի վերաբերյալ:
ՔՄՀՀԿ ներկայացուցիչ Ռուբեն Մեհրաբյանի դիտարկմանը, թե այս տարվա բյուջեի քննարկումները «ալարկոտ» էին, ՀՀԿ պատգամավոր, ԱԺ տնտեսական հարցերի մշտական հանձնաժողովի նախագահ Վարդան Այվազյանը հակադարձեց, թե բյուջետային քննարկումները տևել են 1.5 ամիս, և «ալարկոտ» ձևակերպումը տեղին չհամարեց: Ըստ նրա՝ 390 օրենքներից 125 օրենսդրական նախաձեռնությունները քննարկվել են ԱԺ տնտեսական հարցերի մշտական հանձնաժողովում ժամեր և օրեր:
«Ազատ դեմոկրատներ» կուսակցության ներկայացուցիչ Տաթևիկ Ավետիսյանի ներկայացմամբ` ԱԴԿ տնտեսական քաղաքականությունը բարեփոխումների շարք է, որը կնպաստի տնտեսական աճին, ձեռնարկատիրական ոլորտի զարգացմանը, հարկային դաշտի նախատեսվող բարեփոխումները կնպաստեն ավելի լայն շրջանակների գործարարությամբ զբաղվելուն և այլն:
ՀՅԴ պատգամավոր, ԱԺ ֆինանսավարկային և բյուջետային հարցերի մշտական հանձնաժողովի անդամ Արծվիկ Մինասյանի խոսքով՝ ՀՅԴ նպատակը սոցիալական շուկայական մոդելի իրագործումն է, ասինքն՝ ոչ թե ամեն ինչ պետք է որոշի շուկան, այլ շուկան պետք է ամեն ինչով ծառայի մարդուն: Այդ դեպքում, ըստ Ա. Մինասյանի, եթե շուկան նպաստում է` ազատ է, եթե խեղաթյուրում է` պետությունը պետք է կարգավորի: «Շուկան պետք է շնչի, բայց այնքան օդ կուլ չտա, որ հետո վիրուսներ արտաբերի»,- նշեց Ա. Մինասյանը: ՀՅԴ պատգամավորը հայտարարեց, որ իրենց ծրագրային դրույթներից է ՀՀ մրցունակության բարձրացումը, պետք է ապահովել հնարավորինս շատ հանրային աջակցություն այն ծրագրերում, որոնք բերելու են տնտեսական մրցակցության լիարժեք գործադրմանը, որը նշանակում է ի սկզբանե բացառել մենաշնորհիների առկայությունը, եկամուտների բաշխումը պետք է կատարվի ավելի երկարաժամկետ ծրագրով` մեկի փոխարեն երեք, նաև դրամավարկային և հարկաբյուջետային քաղաքականությունների հիմնարար փոփոխություններ են հարկավոր:
ՀԱԿ ներկայացուցիչ, տնտեսագետ Վահագն Խաչատրյանի խոսքով՝ ՀԱԿ-ում համախմբված քաղաքական ուժերի տնտեսական ծրագրերը միավորվել են 100 քայլում: «Առաջին խնդիրը «շուկայական տնտեսություն» հասկացությունը վերականգնելն է: Որևէ ուղղությունը` սոցիալիստական, լիբերալիստական կամ այլ, հարաբերական է»,- նշեց Վ. Խաչատրյանը` հավելելով, որ այս պայմաններում բոլոր պետություններում դժվարին պահին դիմում են պետության աջակցությանը, և պարզ չէ, թե որտեղ են սահմանները պետության, որտեղ՝ ազատ շուկայի:
«Այսօր Հայաստանում շուկայական տնտեսություն չկա: Այն, ինչ կար, ստեղծվել էր 90-ականների բարեփոխումների արդյունքում, դա վերացել է: Տնտեսական բարեփոխումները երկրորդ շրջանը չի սկսվել, որը և պետք է իրականացվի: Դա է ՀԱԿ հիմնական նպատակակետը»,- ասաց Վ. Խաչատրյանը:
Նա շեշտեց, որ տնտեսական բարեփոխումները և կոռուպցիայի դեմ պայքարը գրեթե նույնն են, և Հայաստանում կոռուպցիան ունի քաղաքական նպատակներ, որպեսզի չլինի ազատ մրցակցություն տնտեսությունում, քաղաքականությունում և այլն. «Հիմնականը պետք է լինի օրենքի գերակայության խնդիրը»:
