Գերմանիայում գտել են կոմպոզիտոր Լյուդվիգ վան Բեթհովենի՝ մինչ այժմ անհայտ նամակը: Այն կցուցադրվի Լյուբեկում՝ Բրամսի ինստիտուտում:
Ինչպես հաղորդում է BBC-ն, Բեթհովենը 6 էջանոց նամակը գրել է 1823 թ. և այն հասցեագրել իր ընկեր, երաժիշտ Ֆրանց Անտոն Շտոքհաուզենին: Նամակում կոմպոզիտորը բողոքում է վատ առողջական վիճակից և ծանր ֆինանսական դրությունից:
Նամակը գրելու ժամանակ կոմպոզիտորը խուլ էր և փողի սուր կարիք ուներ: Բեթհովենն ընկերոջը խնդրում է օգնել հովանավոր գտնել իր վերջին աշխատանքի՝ «Հանդիսավոր պատարագի» համար:
Երաժշտական փորձագետները հայտնում են, որ նամակը շատ կարևոր պատմական արժեք ունի: Անցյալ տարի Բեթհովենի՝ ընդամենը 6 բառից բաղկացած գնումների ցուցակը աճուրդում վաճառվեց 60 հազար դոլարով:
