«Անցած տարի «Կոմիտաս» քառյակը տվել է 13 համերգ Երևանում ու մարզերում: 2012 թ. պլանավորում ենք արդեն համերգներով հանդես գալ արտասահմանում». այս մասին «Առաջին լրատվական»-ի հետ զրույցում տեղեկացրեց քառյակի պրոդյուսեր Հայկ Վարդանյանը:
Մեզ հետ զրույցում նա տեղեկացրեց, թե տարվա գլխավոր ձեռքբերումն այն էր, որ քառյակի ալբոմը` «Կոմիտասյան մանրանվագները», ճանաչվեց «Տարվա լավագույն դասական ալբոմ», քառյակի թավջութակահարուհին` Հասմիկ Վարդանյանը, Իտալիայում մասնակցել է փառատոնի և հաղթանակ տարել:
2011-ին քառյակն իր ուշադրությունը կենտրոնացրել էր բազիսային էլեմենտների ու ներկայության վրա, բացի այդ` մեծ ուշադրություն է դարձվել քառյակի ներկայությանը սոցցանցերում: «Դրանով կարողացանք աշխարհին հիշեցնել, որ «Կոմիտաս» քառյակը կա: Ցավոք, նույնիսկ Հայաստանում շատերը չգիտեին` որ քառյակը դեռ գործում է»,- հավելեց վերջինս` տեղեկացնելով, որ զուտ համերգային գործունեությունը քիչ է, որ քառյակի մասին իմանա անգամ 3 միլիոնանոց Հայաստանը: Հենց դրա շնորհիվ, ըստ Հ. Վարդանյանի, քառյակը նորից սկսեց հյուրախաղերի հրավերներ ստանալ:
Խոսելով քառյակի ապագա հյուրախաղերից` վերջինս տեղեկացրեց, որ փետրվարի 4-ին քառյակը հյուրախաղերով հանդես կգա Խորվաթիայի Դուբրովնիկ քաղաքում, պլանավորվում է ֆրանսիական մի շրջագայություն, որի շուրջ բանակցություններ են ընթանում:
«Հիմնական նախագծերից մեկը, որ ուզում ենք այս տարի իրականացնել, «88» խորագիրը կրող ցուցահանդեսի բացումն է լինելու` նվիրված քառյակի 88-ամյակին»,- ասաց Հ. Վարդանյանը` նշելով, թե ցուցահանդեսի հիմնական նպատակը «Կոմիտասի» փառահեղ պատմության ցուցադրությունն է։ Կցուցադրվի 120 երկրներում քառյակի համերգային գործունեությունը` աֆիշներով, լուսանկարներով, ձայնասկավառակների տեսքով:
Միջոցառումը, ըստ նրա, պետք է լինի մասշտաբային, և արդեն բանակցություններ են ընթանում քառյակի կորպորատիվ գործընկերների հետ:
«Ծրագրվում է նաև «Հայկական ժողովրդական լավագույն մանրանկարներ» ալբոմի վերաթողարկումը, որը թողարկվել էր սակավ քանակությամբ մշակույթի նախարարության աջակցությամբ:
«Կոմիտաս» քառյակը 1924 թվականից` հիմնադրման օրից, 50 տարի շարունակ գործել է Մոսկվայում, ապա տեղափոխվել Հայաստան:
