Ամանորյա տոները իրենցից հետո թողնում են հուշեր և ավելորդ քաշ։ Իսկ ավելորդ քաշից ազատվելու համար շատերն արդեն սկսել են խիստ սննդակարգի անցնել։ Ստացվում է, որ ուտելու հաճույքը զգալու համար, մեր քաղաքացիները պատրաստ են այլևս իրենց զրկել ուտելու հաճույքից։ Սակայն ինչպես «Առաջին լրատվական»-ի հետ զրույցում խորհուրդ տվեցին 1-03 ծառայությունից «կտրուկ անցումը դիետայի» վտանգավոր է առողջության համար։
Բացի այդ, քաշի կտրուկ անկումը հետագայում հանգեցնում է քաշի կտրուկ ավելացման, և օրգանիզմը ստիպված է լինելու հավերժական պայքարի մեջ մտնել ավելորդ քաշի դեմ: Ուստի մասնագետները խորհուրդ են տալիս պարզապես հետևել օրվա սննդակարգին։ Այսինքն` սնվել չափավոր։ Ժամը 19-ից հետո աշխատել ընդհանրապես ոչինչ չուտել, օգտագործել կանաչ թեյ և շատ հեղուկներ, որպեսզի ավելորդ ճարպային մասը օրգանիզմից դուրս գա։ Իսկ ժամը 19-ից առաջ, ի տարբերություն տոնական օրերի, քիչ սնվել, որ օրգանիզմը վերադառնա նախկին սննդակարգին, բացի այդ` խորհուրդ է տրվում սննդակարգում որքան հնարավոր է հացը պակասեցնել։ Եթե այս սննդակարգին հետևեն, ամեն ինչ կկարգավորվի։ Արդյունքում, ավելորդ քաշ հավաքածները կվերադառնան նախկին քաշին։