«Առաջին լրատվական»-ի հետ զրույցում տարվա ձեռքբերումներն ու կորուստները ներկայացրեց դրամատուրգ Կարինե Խոդիկյանը: Նա ամենամեծ կորուստը համարում է արտագաղթի ահագնացող ծավալները, իսկ վտանգը` զինված ուժերից ստացվող հերթական ահասարսուռ լուրը: Մշակութային կյանքում Կարինե Խոոդիկյանը անդառնալի կորուստ է համարում Օհան Դուրյանի բացակայությունը: «Մենք զրկվեցինք մեկ իմաստուն մեծի` ամեն անգամ կշռադատված ու բոլորիս համար այդքան շատ կարևոր խոսքից»,- ցավով նշեց դրամատուրգը:
Անդրադառնալով ձեռքբերումներին`խոսեց իշխանություն-ընդդիմություն երկխոսության մասին: Նրա համոզմամբ` արդեն ժամանակ առ ժամանակ մենք նույնպես ցանկություն ենք ունենում ինչ-որ հարցեր քաղաքակիրթ կերպով լուծելու: «Թե ինչքանով է դա հաջողվում` այլ խնդիր է: Այսինքն` այստեղ գտածն ու կորցրածը հավասարազոր են: Ընդ որում, գտածը ոչ մեկինը չէ, իսկ կորուստը ամբողջ հասարակությանն է»,- մեկնաբանեց Կ. Խոդիկյանը:
