Տեղեկատվության ազատության ոլորտում 2011թ.-ը նշանավորվեց նախ` օրենսդրական ձեռքբերումներով: «Առաջին լրատվական»-ի հետ զրույցում իր կարծիքը հայտնեց Ինֆորմացիայի ազատության կենտրոնի հիմնադիր-նախագահ Շուշան Դոյդոյանը` ամփոփելով տարվա ձեռքբերումները և կորուստները տեղեկատվության ազատության ոլորտում:
«Մասնավորապես, ՀՀ Վարչական դատավարության օրենսգրքում կատարվեց փոփոխություն, համաձայն որի` տեղեկատվության ազատության իրավունքը խախտած պաշտոնյային վարչական պատասխանատվության ենթարկելու համար արձանագրության առկայության պահանջը վերացավ»,- նշեց Շ. Դոյդոյանը:
Նշենք, որ ՏԱ գործերով արձանագրություն կազմող մարմինը օրենքով սահմանված չէր, և նախկինում ՏԱ գործերով արձանագրության բացակայության պատճառով պաշտոնյաների դեմ բերված մի շարք դատական հայցեր մերժվել են:
Ինֆորմացիայի ազատության կենտրոնի հիմնադիր-նախագահ Շուշան Դոյդոյանը նաև տեղեկացրեց, որ 2011թ.-ին ԻԱԿ-ը տարբեր պաշտոնյաների դեմ հարուցել է 4 դատական գործ` մարդկանց տեղեկատվություն ստանալու իրավունքը ոտնահարելու համար։ Ըստ նրա` ԻԱԿ-ն արդեն 32 դատական գործի հեղինակ է։ Այս գործերի քանակը վկայում է այն մասին, որ տեղեկատվության ազատության ոլորտում դեռևս առկա են բազում չլուծված խնդիրներ։
2011թ.-ին ՏԱ ոլորտի մեկ այլ նշանակալի ձեռքբերում է համարում Տեղեկատվության ազատության ոչ ֆորմալ կրթական կենտրոնի հիմնադրումը և գործարկումը, որի շնորհիվ հարյուրավոր քաղաքացիական և համայնքային ծառայողներ 2011թ.-ին հնարավորություն ունեցան բարելավելու տեղեկատվության ազատության իրավունքի վերաբերյալ իրենց գիտելիքը:
« 2011թ.-ին մեր մյուս ձեռքբերումը ԻԱԿ-ի կողմից ՀՀ 10 մարզպետարանների և ՀՀ տարածքային կառավարման նախարարության պաշտոնական կայքերի ստեղծումն ու հանրայնացումն էր»,- նշեց Շ. Դոյդոյանը ` հավելելով, որ ՀՀ տարածքային կառավարման նախարարության պաշտոնական կայքը Խոսքի ազատության պաշտպանության կոմիտեի կողմից 2011թ.-ին ճանաչվեց ՀՀ լավագույն պաշտոնական կայքը։
Տեղեկացնենք, որ 2011թ.-ին ԻԱԿ-ը ներկայացրեց www.GiveMeInfo.am կայքը, որը յուրաքանչյուրին հնարավորություն է ընձեռում ներմուծել իր ՏԱ հարցումը և դրան առնչվող բոլոր փաստաթղթերը (պատասխանը, կից փաստաթղթերը) կայք: Արդյունքում ստեղծվում է տեղեկատվության ազատության ոլորտի առավել ամբողջական վիճակագրություն, որին մասնակցում է յուրաքանչյուր ոք: Բացի այդ, տեղեկատվություն տնօրինող պաշտոնյայի ոչ պատշաճ պատասխանը կամ հարցումն անտեսելը հայտնվում է համացանցում` հասարակության ուշադրության կենտրոնում:
