Դեկտեմբերի 28-ին Ազգային ժողովի փոխնախագահ Էդուարդ Շարմազանովը հանդիպել է Ավստրալիայի Նոր Հարավային Ուելսի խորհրդարանի անդամ Ուոլթ Սեքորդին: Հանդիպմանը ներկա են եղել նաև ՀՅԴ խմբակցության անդամ Արա Նռանյանը:
Պարոն Շարմազանովը պարոն Սեքորդին շնորհակալություն է հայտնել Հայոց ցեղասպանության փաստի, Արցախյան հիմնախնդրի և ընդհանրապես հայ ժողովրդի ճակատագրի հանդեպ ցուցաբերած հետաքրքրության ու մտահոգության համար և հույս հայտնել, որ ՀՅԴ խմբակցության պատգամավորների շնորհիվ ստեղծված ներկա հանդիպումը շարունակական բնույթ կստանա և կդառնա միջխորհրդարանական հարաբերությունների հետագա զարգացման հիմք:
Պարոն Ուոլթ Սեքորդը տեղեկացրել է, որ ինքը Հայաստանի հետ պատգամավորական բարեկամության խմբի փոխնախագահն է: Շատ է լսել ցեղասպանություն տեսած հայ ժողովրդի պատմության, նրա մշակույթի ու ժողովրդավարական երկիր կառուցելուն միտված ներկա գործընթացների մասին, բայց որոշել է ամեն ինչ իր աչքերով տեսնել: Ինքը առաջին Ավստրալիացի պատգամավորն է, որ եղել է Արցախում, հանդիպել ԼՂՀ-ի ԱԺ նախագահի հետ, զգացել անկախության ձգտող արցախահայության կամքն ու նպատակասլացությունը: Նա շնորհակալություն հայտնեց Ավստրալիայի հայկական համայնքին Հայաստան այցին աջակցելու համար:
Անդրադառնալով Հայոց ցեղասպանության ճանաչման միջազգային գործընթացների մասին` երկուստեք արձանագրել են, որ ցեղասպանության կանխարգելման լավագույն միջոցը այն դատապարտելն է, իսկ Արցախի անկախ ու ազատ ապրելու իրավունքը անբեկանելի է:
Պարոն Ուոլթ Սեքորդը տեղեկացրեց, որ հանդիպումից անմիջապես հետո ինքը կայցելի ցեղասպանության թանգարան ու հուշահամալիր` իր հարգանքի տուրքը մատուցելու անմեղ զոհերի հիշատակին:Այս մասին «Առաջին լրատվական»-ին տեղեկացնում են ՀՀ ԱԺ հասարակայնության և տեղեկատվության միջոցների հետ կապերի վարչությունից:
