Նա նշեց, որ ընդհանուր առմամբ անցնող տարում արտաքին քաղաքական բնագավառում Հայաստանը բավականին լուրջ ձեռքբերումներ է ունեցել: Քաղաքագետը կարևորեց Ֆրանսիայի խորհրդարանի և Իսրայելի Կնեսետի կողմից ընդունված որոշումները: Ըստ քաղաքագետի` այդ որոշումները էապես կարող են ազդել նաև ԼՂ հարցի կարգավորման վրա: Հենց այդ առումով քաղաքագետը պատահական չհամարեց այն հանգամանքը, որ Ֆրանսիայի խորհրդարանի որոշումից Ադրբեջանը նույնքան էր վրդովվել, որքան Թուրքիան: Մելիք-Շահնազարյանի գնահատմամբ՝ դատապարտելով Թուրքիային` մենք զրկում ենք Ադրբեջանին իր միակ դաշնակցից, և հավանական պատերազմի պարագայում Ադրբեջանը չի կարող ակնկալել Թուրքիայի առավել ակտիվ աջակցությունը:
Ըստ այդմ, քաղաքագետի գնահատմամբ, գալիք տարում, ինչպես նաև առաջիկա մյուս տարիներին, պատերազմի հավանականությունը մեծ չէ. «Առաջիկայում պատերազմ չի լինի: Մենք ժամանակ ունենք պատրաստվելու, և ժամանակը գործում է այն պետության օգտին, որը կկարողանա ճիշտ օգտագործել այն: Եթե մենք ճիշտ օգտագործենք մեզ տրված ժամանակը, ապա կկարողանանք սպանել պատերազմը առանց պատերազմի»:
