Հայաստանում ազատ տնտեսական գոտիների գործունեությունը համակարգող միջգերատեսչական հանձնաժողովն այսօր անդրանիկ նիստում քննարկեց հանձնաժողովի գործունեությանն առնչվող մի շարք փաստաթղթեր, «Մարս» և «ԵրՄՄԳԻ» ընկերությունների տարածքում ազատ տնտեսական գոտի ստեղծելու համար «Սիտրոնիքս Արմենիա» ընկերության ներկայացրած հայտի ընդունման նպատակահարմարությունը:
ՀՀ էկոնոմիկայի նախարար Տիգրան Դավթյանը նշեց, որ ազատ տնտեսական գոտիների ստեղծման իրավական բազան արդեն ստեղծվել է, «Սիտրոնիքս»-ի հայտը մանրակրկիտ կերպով ուսումնասիրվել է մասնագետների կողմից:
Նախարարի խոսքով` այսօր սկիզբ է դրվում պրակտիկ փուլին:
«Նախատեսում ենք առաջիկա տարիներին ունենալ 2-3 ազատ տնտեսական գոտիներ, որոնք կունենան ոլորտային հետևյալ ուղղվածությունը` ագրո («Զվարթնոց»-ի հենքի վրա), արդյունաբերական և տեխնոլոգիական («Մարս» գործարանի հենքի վրա), աշխատում ենք ոսկերչության ոլորտի ազատ տնտեսական գոտու ստեղծման ուղղությամբ: Հետաքրքրություն կա մասնակիցների և ապագա պոտենցիալ ներդրողների կողմից»,- ասաց Տ. Դավթյանը` շեշտելով, որ ազատ տնտեսական գոտիները հիմնականում ձևավորվելու են օտարերկրյա ներդրումների և արտահանման ուղղվածության նպատակով, և արտոնյալ բիզնեսը չի կարող նորմալ հարկային դաշտից տեղափոխվել այստեղ:
Նախատեսվում է, որ այդ երկու տարածքներում ազատ տնտեսական գոտին կունենա բարձր տեխնոլոգիական, գիտատար և նորարարական արտադրական ուղղվածություն, մասնավորապես` էլեկտրոնիկայի, ճշգրիտ սարքաշինության, դեղագործության, ՏՏ, այլընտրանքային էներգետիկայի և այլ բարձր տեխնոլոգիական արտադրության ոլորտներում:
