Թուրքական Sabah թերթի փոխանցմամբ, թուրքական անվտանգության ուժերը վերջին շրջանում մեծ հաջողություններ են արձանագրել Թուրքիայում ահաբեկչական հռչակված և արգելված «Քրդստանի աշխատավորական» կուսակցության (PKK) դեմ պայքարում։ Խոսքը թուրքական բանակի, ոստիկանության և Ազգային հետախուզական կազմակերպության (MIT) մղած պայքարի մասին է։
Նշվում է, որ վերջին երկու ամիսներին Թուրքիայում իրականացված գործողությունների արդյունքում սպանվել է 67 և գերի է վերցվել 27 PKK-ական։
Հիշեցնենք, որ օրեր առաջ թուրքական Today’s Zaman թերթը գրել էր, որ Թուրքիայի կառավարությունը նոր ռազմավարություն է մշակել PKK-ի դեմ։ Խոսքը վերաբերում է PKK-ի մոտ 300 առավել հեղինակավոր գործիչներին ու դաշտային հրամանատարներին ֆիզիկապես ոչնչացնելուն։ Այդ նպատակով կազմվել է հատուկ «մահվան ցուցակ»։
Ռազմավարության հեղինակը Թուրքիայի ներկայիս ներքին գործերի նախարարն է՝ Իդրիս Նաիմ Շահինը։ Թուրքական թերթի տվյալներով, պաշտոնական Անկարան հրաժարվել է «Քրդական հարցի» քաղաքական ասպեկտից՝ փոխարենը վճռելով կտրուկ հարձակում ձեռնարկել PKK-ի վերնախավի վրա։