Ինչպես արդեն տեղեկացրել էր «Առաջին լրատվականը», երեկ Ադրբեջանի խորհրդարանը վավերացրեց Թուրքիայի և Ադրբեջանի միջև ամռանը կնքված «Ռազմավարական գործընկերության և փոխօգնության մասին» պայմանագիրը:
Ադրբեջանի և Թուրքիայի նախագահները այդ համաձայնագիրը ստորագրել էին Բաքվում օգոստոսին, սակայն մինչ այժմ երկկողմ համաձայնագրի դրույթները գաղտնի էին: Առաջին տեղեկություններն ի հայտ եկան անցյալ շաբաթ, երբ 5 գլխից և 23 հոդվածից կազմված այս փաստաթղթի տեքստը գաղտնազերծվեց ամբողջությամբ:
Այսպիսով, Ադրբեջանի և Թուրքիայի նախագահների ստորագրած պայմանագրի երկրորդ կետում ասվում է. «Եթե պայմանագիրը ստորագրած կողմերից մեկը զինված հարձակման կամ ագրեսիայի ենթարկվի այլ պետության կամ պետությունների խմբի կողմից, ապա մյուսը պարտավորվում է փոխադարձ օգնություն տրամադրել` առկա բոլոր հնարավորությունների կիրառմամբ»: Պայմանագրի ևս մի կետի համաձայն` կողմերը սերտացնելու են գործակցությունը ռազմական և ռազմարդյունաբերական ոլորտներում: Պայմանագրում նշված է նաև. «Ստորագրող կողմերը պարտավորվում են թույլ չտալ, որպեսզի իրենց տարածքը օգտագործվի մյուս կողմի դեմ ագրեսիվ կամ բռնի գործողությունների իրականացման նպատակով»:
Պաշտոնական Բաքուն և Անկարան նաև պարտավորվում են համակարգել երկու պետությունների զինված ուժերի գործողությունները: Համաձայնագրում այս առթիվ նշված է. «Պաշտպանական և փոխադարձ օգնության ծրագրի շրջանակներում նախատեսված համատեղ ռազմական գործողությունների իրականացման նպատակով կողմերը կարդիականացնեն ռազմական ենթակառույցները, համատեղ զորավարժություններ կանցկացնեն, ինչպես նաև քայլեր կձեռնարկեն երկու պետությունների զինված ուժերի համակողմանի մարտական պատրաստությունն ապահովելու նպատակով»:
Ինչպես տեղեկացնում է abc.az-ը, Ադրբեջանի խորհրդարանի արտաքին կապերի և միջխորհրդարանական համագործակցության հարցերով հանձնաժողովի ղեկավար Սամեդ Սեիդովը նշել է, թե իրենք վաղուց էին սպասում այս փաստաթղթի ընդունմանը. «Համաձայնագրի կետերից մեկում նշվում է, որ եթե պայմանագիրը ստորագրած կողմերից մեկը զինված հարձակման կամ ագրեսիայի ենթարկվի երրորդ պետության կողմից, ապա ռազմա-քաղաքական օգնություն է տրամադրում մյուսին: Այստեղից բխում է, որ Ադրբեջանի անվտանգությունը նաև Թուրքիայի անվտանգությունն է»:
Տեսականորեն Թուրքիան, ըստ համաձայնագրի, Ադրբեջանի անվտանգության երաշխավորը կլինի Իրանի, Ռուսաստանի, Վրաստանի, Հայաստանի, Թուրքմենստանի և Ղազախստանի հարձակման դեպքում: Պոտենցիալ «թշնամիների» շարքը, ընդ որում, բավական երկար է. ներառված են ոչ միայն Հայաստանը, Վրաստանը, Ռուսաստանը, Սիրիան, Իրաքը, այլև հյուսիսային Աֆրիկայի պետությունները և եվրոպական պետությունները, որոնք Թուրքիայի դեմ ագրեսիայի համար նավատորմ ունեն:
