Ադրբեջանական APA լրատվական գործակալությանը տված հարցազրույցի ժամանակ Իռլանդիայի արտաքին գործերի և առևտրի նախարար Էյմոն Գիլմորը, ով 2012 թվականից ստանձնելու է ԵԱՀԿ-ի նախագահությունը, անդրադարձել է ԵԱՀԿ-ի տիրույթում առկա հակամարտությունների կարգավորմանը.
«Ես ակտիվորեն նպաստելու եմ ԵԱՀԿ-ի տիրույթում առկա հակամարտությունների կարգավորմանը։ Դրա համար պետք է ստեղծվեն այնպիսի մեխանիզմներ, ինչպիսին որ Մինսկյան գործընթացն է։ Հնարավորության դեպքում ես ամենուրեք աջակցելու եմ կառուցողական երկխոսության կայացմանը։
Ես շատ անհանգստացած եմ այսպես կոչված ձգձգվող հակամարտությունների կապակցությամբ։ Առանց հակամարտող կողմերի ցուցաբերած քաղաքական կամքի, անհնար է ցանկացած հակամարտության կարգավորումը։ Ես առաջին հերթին հենվելու եմ Վիլնյուսում տեղի ունեցած Նախարարների խորհրդի նիստի արդյունքների վրա։
Ես պատրաստ եմ մեր ունեցած փորձը կիսել ԵԱՀԿ անդամ երկրների հետ։ Սակայն սխալ է կարծելը, թե մեկ հակամարտության կարգավորումը կարող է բաղադրատոմսի տեղ ծառայել մյուս հակամարտության համար։ Ես պլանավորում եմ 2012 թվականին հաճախակի այցեր կատարել ԵԱՀԿ-ի տարածաշրջաններ։ Ոչ վաղ անցյալում ես նշանակեցի Հարավային Կովկասի գծով իմ անձնական ներկայացուցչին։
Խոսքն իռլանդացի դիվանագետ Պատրիկ Մերֆիի մասին է, ով նախկինում որպես դեսպան է աշխատել ԽՍՀՄ-ում, Գերմանիայում, Իսպանիայում ու Ճապոնիայում։ Նա արդեն Լիտվայի նախագահության ժամանակ այցելել է տարածաշրջան և իր կանոնավոր շփումները կշարունակի 2012 թվականի ընթացքում»։
