«Լրագրողներ առանց սահմանների» միջազգային կազմակերպությունն ամփոփել է 2011թ.-ը և կազմել լրագրողների համար աշխարհի ամենավտանգավոր կետերի ցուցակը: Զեկույցը հրապարակվել է դեկտեմբերի 21-ին:
Այսպես, լրագրողների համար ամենավտանգավոր վայրերն են.
1. Բահրեյնի մայրաքաղաք Մանաման
2. Կոտ-դ’Իվուարի ամենամեծ քաղաքը՝ Աբիջանը
3. Կահիրեի Թահրիր հրապարակը (Եգիպտոս)
4. Լիբիայի Միսրատա քաղաքը
5. Մեքիսկայի Վերակրուս նահանգը
6. Պակիստանի Խուձար քաղաքը
7. Ֆիլիպինյան արշիպելագի մի շարք մունիցիպալ շրջաններ
8. Սոմալիի մայրաքաղաք Մոգադիշոն
9. Սիրիայի Դարաա, Հոմս, Դամասկոս քաղաքները
10. Եմենի մայրաքաղաք Սանայի Ազատության հրապարակը
Կազմակերպության տվյալներով՝ 2011թ. սպանվել է 66 լրագրող, նրանցից 20-ը՝ Մերձավոր Արևելքի երկրներում՝ «Արաբական գարնան» իրադարձությունները լուսաբանելիս, 18-ը՝ Լատինական Ամերիկայի երկրներում:
Լրագրողների համար ամենավտանգավոր երկիրը Պակիստանն է. այստեղ զոհվել է ԶԼՄ-ների 10 ներկայացուցիչ: Ընդհանուր առմամբ, անցյալ տարվա համեմատությամբ, լրագրողների սպանութան դեպքերը 16%-ով ավելացել են:
Բացի այդ, զեկույցում նշվում է, որ ձերբակալվել է 1044 լրագրող, 1959 լրագրող հարձակման կամ սպառնալիքի է ենթարկվել: ԶԼՄ 71 աշխատակից առևանգվել է, 73-ը ստիպված են եղել լքել իրենց երկիրը:
Հատուկ ուշադրության են արժանացել ակտիվ բլոգերները և համացանցի օգտատերերը: Այս ոլորտում սպանվել է 5, հարձակման է ենթարկվել 62 մարդ, 199-ը ձերբակալվել են:
Կազմակերպության հաշվարկներով՝ աշխարհի 68 երկրներում գոյություն ունի համացանցի գրաքննություն:
