Ռուսական Regnum լրատվական գործակալության փոխանցմամբ՝ Վրաստանի խորհրդարանը պատրաստվում է ազգային անվտանգության նոր հայեցակարգի ընդունմանը։ Ազգային անվտանգության հայեցակարգի փաստաթուղթը երեկ քննարկվել է Վրաստանի խորհրդարանի խորհրդարանական կոմիտեների նիստերում։
Խոսքը իրավական հարցերով, պաշտպանության ու անվտանգության գծով, Եվրոպային ինտեգրման և Կովկասի ու սփյուռքի հարցերով խորհրդարանական կոմիտեների մասին է։ Նոր փաստաթուղթը մշակվել է Վրաստանի կառավարության կողմից։
Սակայն դրա հեղինակներն ընդգծում են, որ փաստաթուղթը վերջնական տեսքի բերելու գործընթացին ակտիվ մասնակցություն են ցուցաբերել քաղաքական կուսակցությունները, հասարակական կազմակերպություններն ու հասարակության ներկայացուցիչները։
Փաստաթղթում հստակեցված են Վրաստանի ազգային արժեքներն ու շահերը, երկրի առջև ծառացած սպառնալիքները, ռիսկերն ու մարտահրավերները, արտացոլված են անվտանգության քաղաքականության հիմնական ուղղությունները։
Փաստաթղթում խոսք է գնում Ռուսաստանի հետ փոխհարաբերությունների, երկրի պաշտպանության ու անվտանգության համակարգի զարգացման, ՆԱՏՕ-ին ու ԵՄ-ին ինտեգրվելու, Հարավային Կովկասում համագործակցության և այլ կարևոր խնդիրների մասին։
Նշվում է, որ սա նմանատիպ երկրորդ փաստաթուղթն է։ Վրաստանի կառավարության ներկայացուցիչներն ազգային անվտանգության նոր հայեցակարգի մշակման անհրաժեշտության մասին առաջին անգամ բարձրաձայնեցին 2008 թվականի օգոստոսյան պատերազմից հետո։
Հիշեցնենք, որ Վրաստանի խորհրդարանը երկրի ազգային անվտանգության հայեցակարգի առաջին փաստաթուղթը հաստատել է 2005 թվականին։
