Վենեսուելայի նախագահ Ուգո Չավեսը քննադատել է ԱՄՆ նախագահ Բարաք Օբամային վենեսուելական El Universal թերթին տված հարցազրույցի համար: Այս մասին հայտնում է РИА Новости-ն:
«Պարոն Օբաման կրկին հարձակվում է մեզ վրա, ավելի լավ է նա իրեն նվիրի իր երկրին և զբաղվի իր խնդիրներով»,- ասել է Չավեսը Վենեսուելայի կառավարության նիստի ժամանակ:
Իր հարցազրույցում Օբաման քննադատել է Վենեսուելայի հարաբերությունների ամրապնդումը Իրանի և Կուբայի հետ, մամուլի ազատության բացակայությունը:
Չավեսի կարծիքով՝ Օբամայի բոլոր հայտարարությունները կապված են միայն ընտրողների ձայնը շահելու հետ: «Մի եղիր այդպես անպատասխանատու, Օբամա, կեղծավոր ես, դու պարզապես կեղծավոր ես»,- հայտարարել է Վենեսուելայի առաջնորդը` դիմելով ԱՄՆ նախագահին:
Չավեսը Օբամային անվանել է «մեծ անհաջողություն» ԱՄՆ-ում ապրող աֆրիկացի ներգաղթյալների, աղքատ ամերիկացիների, ինչպես նաև այն աֆրիկական երկրների համար, որոնք նրան հավատում էին: «Նրանք ամաչում են քեզ համար։ Ընդհանուր առմամբ, մեզ հանգիստ թող ու քո ձայնը փնտրիր ԱՄՆ-ում, սա այն է, ինչ դու պիտի անես»,- ասել է Չավեսը:
