Հյուսիսային Կորեան համաձայնել է դադարեցնել ռազմական նպատակներով ուրանի հարստացման աշխատանքները:
Ինչպես հայտնում է Yonhapnews-ը, վկայակոչելով Սեուլում դիվանագիտական իր աղբյուրը, ուրանի հարստացման ծրագրից հրաժարվելը Վաշինգտոնի հիմնական պահանջն է, որը կատարելուց հետո հնարավոր կլինի շարունակել միջուկային զինաթափման բանակցությունները: Ծրագրի դադարեցման փոխարեն, ԱՄՆ-ը համաձայն է Փհենյանին հումանիտար օգնություն տրամադրել՝ 240 հազար տոննա սնունդ:
Ընդ որում, ինչպես գործակալությանը հայտնել է նույն աղբյուրը, Փհենյանը ամերիկացիներից խնդրել է բրինձ, սակայն Վաշինգտոնը տվել է հիմնականում չոր թխվածքաբլիթներ և երեխաների ու պատանիների համար նախատեսված վիտամիններ: ԱՄՆ-ում մտահոգվում են, որ մարդասիրական օգնությունը քաղաքացիական անձանց հասնելու փոխարեն, կհասնի հյուսիսկորեացի զինվորականներին:
Գործակալությունը նշում է, որ դեկտեմբերի 15-16-ը կայացել են Հյուսիսային Կորեայում մարդու իրավունքների հարցերով ԱՄՆ դեսպան Ռոբերտ Քինգի և ԱՄՆ հետ հարաբերությունների գծով Հյուսիսային Կորեայի ԱԳՆ աշխատակից Ռի Կունի բանակցությունները: Քինգը բանակցություններն անվանել է կառուցողական:
Միջուկային զինաթափման վերաբերյալ բանակցություններից Հյուսիսային Կորեան դուրս է եկել 2009 թվականի գարնանը, որից հետո Փհենյանն իրականացրել է միջուկային երկրորդ փորձարկումը: Կորեայի ժողովրդա-դեմոկրատական հանրապետությունը ուրանի հարստացման փորձարկումների մասին հայտարարել է 2010 թվականի վերջին:
