Հռոմում չեզոքացրել են ռումբով նամակ, որն ուղարկվել էր իտալական Equitalia պետական ընկերության ստորաբաժանումներից մեկին:
Ինչպես հաղորդում է France-Presse գործակալությունը, Հռոմի ոստիկանության ներկայացուցչի խոսքերով, ընկերության աշխատակիցները կասկածելի ծանրոցը հայտնաբերել են դեկտեմբերի 15-ին և անմիջապես դեպքի վայր կանչել մասնագետների: Դեպքի վայր ժամանած մասնագետները փաթեթի մեջ գտել են «սև փոշի»:
Հիշեցնենք, որ նմանատիպ ծանրոցի պայթյունի հետևանքով դեկտեմբերի 9-ին Equitalia-ի տնօրենը վնասել էր ձեռքը և աչքը: Միջադեպի պատասխանատվությունը ոչ ոք չի ստանձնել:
Դեկտեմբերի 12-ին Իտալիայի իրավապահ մարմինները հաղորդել են, որ իրենց հաջողվել է չեզոքացնել երկու ծրար, որում եղել են փամփուշտներ և սպառնալիքներ` ուղղված Իտալիայի արդարադատության նախարարին և Հռոմի քաղաքապետին: Նույն օրը ռումբով ծանրոց են վնասազերծել Փարիզում` Հունաստանի դեսպանատանը: Ոստիկանությունը ենթադրում է, որ հնարավոր է՝ ծանրոցն ուղարկվել է Իտալիայից:
