News Georgia-ի փոխանցմամբ՝ Հարավային Օսիայի ընդդիմության առաջնորդ Ալլա Ջիոևան, ով կիրակի օրը Ցխինվալի Կենտրոնական հրապարակից հեռացրել էր իր հազարավոր համակիրներին, հայտարարել է, որ իր համակիրների հետ դարձյալ հավաքվելու է այդ հրապարակում՝ կառավարության շենքի առջև։
Ջիոևան դժգոհ է նրանից, որ Հարավային Օսիայի իշխանությունները չեն կատարում ընդդիմության հետ ձեռք բերված պայմանավորվածությունները։ Ըստ դրանց՝ Հարավային Օսիայի նախկին նախագահ Էդուարդ Կոկոյտին դեկտեմբերի 9-ին հրաժարական էր տվել, բացի այդ նույն ճակատագրին պետք է արժանանային Հարավային Օսիայի Գերագույն դատարանի նախագահ Ացամազ Բիչենովը և գլխավոր դատախազ Թեյմուրազ Խուգաևը։
Ջիոևան իր հերթին այդ պյամանավորվածությունների շնորհիվ իրավունք էր ստացել մասնակցելու 2012 թվականի մարտի 25-ին կայանալիք նոր նախագահական ընտրություններին։ Մինչդեռ նոյեմբերի 27-ի նախագահական ընտրությունների երկրորդ փուլը չեղյալ էր հայտարարվել Հարավային Օսիայի Գերագույն դատարանի կողմից։
Չնայած այդ բոլոր պայմանավորվածություններին՝ Հարավային Օսիայի խորհրդարանը երեկ քվեարկել է Բիչենովին և Խուգաևին զբաղեցրած պաշտոններից հեռացնելու դեմ, ինչը նշանակում է, որ նրանք շարունակելու են պաշտոնավարել։ Սա հարուցել է Ջիոևայի ու նրա համակիրների զարմանքն ու զայրույթը։
Ջիոևան ու նրա համակիրները դիմել են Ռուսաստանի ղեկավարությանը՝ խնդրելով անհապաղ արձագանքել Հարավային Օսիայում տիրող իրավիճակին։
