Սիրիայի հարավային Դարաա մարզում դասալիքների հետ բախումներում զոհվել է 27 սիրիացի զինվոր և ոստիկան: Այս մասին հաղորդում է Reuters գործակալությունը՝ վկայակոչելով Syrian Observatory for Human Rights իրավապաշտպան կազմակերպությանը:
Գործակալությունը հայտնում է, որ դեպքը տեղի է ունեցել այսօր առավոտյան. սիրիական բանակի դասալիքները մարտի մեջ են մտել Սիրիայի նախագահ Բաշար Ալ-Ասադի օրինապահ ստորաբաժանումների հետ:
Սիրիական բանակի ստորաբաժանումներից մեկի՝ ապստամբների կողմն անցնելու մասին հայտնի էր դարձել դեռ դեկտեմբերի 13-ին: Նշվում էր, որ ևս մի քանի հարյուր զինվորներ ընդդիմության կողմն են անցել երկրի հյուսիսային Իդլիբ մարզում:
Սիրիացի ապստամբները շարունակում են մարտերը նախագահական ուժերի դեմ: Սիրիայում ապստամբությունը սկսվել է 2011 թ. մարտի կեսին: Սկզբում ընդդիմությունը խաղաղ ցույցեր էր կազմակերպում իշխանությունների դեմ, որոնք աստիճանաբար վերածվեցին զինված բախումների կառավարական ուժերի և ցուցարարների միջև:
