Ինչպես հայտում է Грузия Online-ը վրացական կողմը մտադիր է իր դիրքորոշումը ներկայացնել Եվրախորհրդի խորհրդարանական վեհաժողովի մոնիթորինգի կոմիտեի նախագահ Դիկ Մարտիին: Այդ մասին հայտարարել է Վրաստանի արտաքին գործերի փոխնախարար Նինո Կալանդաձեն այսօր հրավիրված մամուլի ասուլիսում: Դիկ Մարտին այսօր ժամանում է Թբիլիսի՝ քննարկելու ԵԽԽՎ-ի՝ եկող տարվա հունվարի 17-ին ծրագրված նիստի նախապատրաստման հետ կապված հարցերը:
«Այցը նախապատրաստական բնույթ է կրում: Հունվարի 17-ին, ինչպես հայտնի է, ամփոփիչ հանդիպում է ծրագրված Ստրասբուրգում, որին մասնակցելու է մեր պատվիրակությունը: Դա այն նիստն է, որտեղ քննարկվելու են նաև ռուս-վրացական պատերազմի վերաբերյալ ընդունված բանաձևերի կատարման-չկատարման հարցերը: Եվրախորհրդի շրջանակներում ընդունվել են մի քանի շատ լավ և ուժեղ բանաձևեր»,-ասել է Կալանդաձեն: Նրա խոսքով՝ «Վրաստանի պաշտոնատարները հնարավորություն կունենան մոնիթորինգի կոմիտեի ներկայացուցչին ծանոթացնելու մեր այն պատկերացումներին, թե մեր շահերն ինչ ձևով պետք է արտացոլվեն վերջնական փաստաթղթում, և Եվրախորհուրդն ինչպես կկարողանա մեր շահերը պաշտպանել վերջնական փաստաթուղթը քննարկելիս»:
Վաղը Մարտին ծրագրում է հանդիպել Վրաստանի ազգային անվտանգության խորհրդի քարտուղար Գեորգի Բոկերիայի, փոխվարչապետ, վերաինտեգրացման հարցերով պետնախարար Եկատերինա Տկեշելաշվիլիի և ԵԽԽՎ-ում Վրաստանի պատվիրակության հետ: Օրվա երկրորդ կեսին Մարտին կմեկնի Վրաստանից:
