Այս տարի անցած տարվա համեմատ ամանորյա աժիոտաժն ավելի մեղմ կլինի, սակայն արդեն իսկ առկա է ապրանքների 5-7% թանկացում. թանկացել են միսը, կրծքամիսը, հնդուհավը և այլն: Այս մասին այսօր ասուլիսում հայտարարեց Սպառողների ասոցիացիայի նախագահ Արմեն Պողոսյանը:
Ինչպես ներկայացրեց Ա. Պողոսյանը` պետական մարմինները գների սանձումն ու մրցակցությունը հաճախ փորձում են առանձին դիտարկել, սակայն դրանք միմյանց հետ սերտորեն կապված են: ՀՀ Տնտեսական մրցակցության պաշտպանության պետական հանձնաժողովը միակն է, որ ունի պետական կարգավիճակ և ըստ այդմ` պատասխանատվություն ու լիազորություններ:
Ըստ Ա.Պողոսյանի` գների կարգավորումը ակնկալվում է այդ հանձնաժողովից: «Մենաշնորհների վիճակը գիտենք, կան ձեռնարկություններ, որ վերահսկում են շուկայի 70-90%-ը: Ե՛վ թանկացումը, և՛ էժանացումը պետք է կամ տնտեսապես հիմնավորված լինեն, կամ պատժված, իսկ պատիժը պետք է ժամանակավրեպ և դիֆերենցված չլինի»,- նկատեց բանախոսը:
Ա.Պողոսյանի կարծիքով` յուրաքանչյուր շուկա ունի իր յուրահատկությունը, օրինակ` մսի շուկան վերահսկելը շատ դժվար է: Այն կարգավորելու համար պետք է կազմակերպել սպանդանոցներ, որտեղ կապահովվեն մսի թարմությունն ու անվտանգությունը:
Սպառողների իրավունքների պաշտպանը նախորդ տարվա համեմատ առաջընթաց է արձանագրում. «Եթե խոսենք սննդամթերքի անվտանգության մասին, որը հիմնականում արտահայտվում է մակնշմամբ, վիճակը բարելավվել է, բայց հեռու է բավարար լինելուց»:
Ա.Պողոսյանը նշեց, որ ստուգումների ժամանակ Երևան քաղաքի 40 խանութներից 17-ը տուգանվեց ժամկետանց ապրանքներ վաճառելու համար:
Մի շարք ապրանքների դեպքում սպառողներին շարունակում են խաբել, օրինակ` շաքարավազի մեջ խոնավության տոկոսը գերազանցում է թույլատրելի սահմանը, հացի դեպքում 20-30%-ը օդ է, սուրճի մեջ կոֆեինն է պակաս: Նման խախտումները առողջությանը վնաս չեն պատճառում, բայց վնասում են սպառողի գրպանին:
Պատասխանելով «Առաջին լրատվական»-ի դիտարկմանը, թե` շատ տնտեսվարողներ մակնշման մեջ փոխում են պիտանելիության ժամկետը, օրինակ` «Սորինի» ֆիրմայի շոկոլադե տուփերի վրա տպված ժամկետը «թարմացվում է», Ա.Պողոսյանը պատասխանեց` նման խախտումները շուրջ 35% են կազմում.
«Աճպարարությունը շարունակվում է, նախ` անընթեռնելի է լինում մակնշումը կամ ծածկված այլ գրառումով, ինչն օրենքով արգելված է, և 2012թ. հունվարի 1-ից պատժամիջոցներ կկիրառվեն նաև նման խախտումների համար»:
Ա.Պողոսյանը նշեց, որ հաջորդ տարի ՏՄՊՊՀ-ից ավելի օպերատիվ աշխատանք են ակնկալում:
Նշենք, որ ասուլիսը կազմակերպել էր «Արցախ» ակումբը` նախապես հայտարարելով, որ ասուլիսին հրավիրված է նաև ՏՄՊՊՀ նախագահ Արտակ Շաբոյանը, ով իբրև թե ընդունել էր հրավերը: Սակայն ՏՄՊՊՀ մամլո քարտուղար Գայանե Սահակյանը մեզ հետ զրույցում հերքեց այն, թե Ա. Շաբոյանը հրավիրվել է նման ասուլիսի, մանավանդ` ՏՄՊՊՀ նախագահը ներկայում գտնվում է ԼՂՀ-ում:
Գ.Սահակյանը նաև հայտնեց, որ հաջորդ շաբաթ նախատեսվում է լրագրողների հետ հանդիպում կազմակերպել հենց ՏՄՊՊՀ-ում` տարին ամփոփելու նպատակով:
