Այն, ինչ կատարվում է Նարեկի և «Նարեկացի» արվեստի միության շուրջ, զարմանք և զայրույթ է առաջացնում: «Առաջին լրատվական»-ի հետ զրույցում նման տեսակետ հայտնեց դրամատուրգ Կարինե Խոդիկյանը`կարծիք հայտնելով «Նարեկացի» արվեստի միության հիմնադիր-նախագահ Նարեկ Հարթունյանի կալանավորման մասին:
Կարինե Խոդիկյանը արվեստի միության մասին խոսքերով չէ, որ գիտե: Դրամատուրգը բազմիցս մասնակցել է «Նարեկացի» արվեստի միության կազմակերպած միջոցառումներին, երեկոներին և հանդիպումներին: Կարինե Խոդիկյանը չկարողացավ չնշել, որ յուրաքանչյուր միջոցառում առանձնանում է իր բարձր որակով, ճաշակով և չափանիշների խստությամբ:
Ըստ դրամատուրգի` Երևանն ունի իսկապես մշակութային կենտրոն, որտեղ Նարեկ Հարթունյանը կարողացել էր համախմբել մշակույթի իսկական գիտակների: «Այնտեղ կեղծը, գլամուրը տեղ չունեն: Շատ բան չեմ հասկանում, թե ինչ է կատարվում Հայաստան երկրում, և թվում է, որ դա ցինիկ փիլիսոփայության եզրերին է հանգում: Այն, ինչ կատարվում է Նարեկի և նրա ստեղծած կենտրոնի շուրջ՝ ոչ միայն զարմանք, զայրույթ է առաջացնում: Չգիտեմ այդ զգացումը դժվար է բացատրել»,- ցավով նշեց դրամատուրգը`հավելելով, որ մարդասպանները, հանցագործները, օրը ցերեկով տաս խաղաղ ցուցարարների մարդասպանները պաշտոններ են ստանում և վայելում կյանքը,մինչդեռ մշակութային գործչին, իսկապես արվեստագետին խայտառակ ձևով կալանավորում են: Նրա համոզմամբ, կարելի էր խնդիրները շատ ավելի հանգամանալից ճշտել մինչ կալանավորելը:
«Մի՞թե այս երկրում այլևս որևէ նորմալ երևույթ չի մնացել, որևէ հարգանք չի մնացել: Ես միայն կարող եմ ասել, որ չեմ հավատում, որ Նարեկը, որին երկու ամսվա կալանք են նշանակել, մեղավոր է որևէ բանում»,- ասաց Կ. Խոդիկյանը`ենթադրելով, որ սա հատուկ քաղաքականություն է սփյուռքահայերի դեմ: Նա զարմանք հայտնեց`ասելով, որ սփյուռքահայերը վերադառնում են իրենց հայրենիք, և նրանց առաջ ճանապարհը փակվում է:
Հիշեցնենք, որ օրեր առաջ կալանավորվել է «Նարեկացի» արվեստի միության հիմնադիր-տնօրեն Նարեկ Հարթունյանը: Առաջիկա երկու ամիսներին նա լինելու է կալանքի տակ:
