ՀՀ նախագահի մամլո գրասենյակից «Առաջին լրատվական»-ին տեղեկացնում են, որ նախագահ Սերժ Սարգսյանն այսօր աշխատանքային այցով ժամանել է Իտալիա:
Այցի առաջին օրը ՀՀ նախագահը Վատիկանում հանդիպել է Հռոմի պապ Բենեդիկտոս XVI-ի հետ: Նախագահի և Նորին սրբության առանձնազրույցից հետո տեղի է ունեցել Հռոմի պապի հետ նախագահի գլխավորած պատվիրակության ընդլայնված կազմով հանդիպումը:
Հանրապետության ղեկավարը և Նորին սրբությունը գոհունակությամբ են խոսել Հայաստանի և Վատիկանի միջև բարձր մակարդակի հարաբերությունների մասին: Կողմերը մտքեր են փոխանակել Մայր աթոռ սուրբ Էջմիածնի և Կաթոլիկ եկեղեցու միջև համագործակցության, հանուն համընդհանուր բարօրության՝ հասարակության մեջ երկու եկեղեցիների ունեցած մեծ դերի մասին:
Ընդգծվել է սերունդներին քրիստոնեական արժեքների ոգով դաստիարակման կարևորությունը:
Ս. Սարգսյանն այսօր հանդիպել է նաև Վատիկանի պետքարտուղար կարդինալ Տարչիցիո Բերտոնեի հետ:
Կողմերը կարևորել են երկկողմ բարձր մակարդակի հարաբերությունները խորացնելու անհրաժեշտությունը: Ս. Սարգսյանը և Կարդինալ Տարչիցիո Բերտոնեն խոսել են մշակութային կապերի ամրապնդման մասին ևս:
Ս. Սարգսյանը շնորհակալություն է հայտնել Վատիկանին՝ արտերկրում հայկական մշակութային ժառանգության պահպանման համար: Երկուստեք համոզվածություն է հայտնվել, որ Հայաստանում և Վատիկանում դեսպանների նշանակումը նոր խթան կհանդիսանա երկկողմ հարաբերությունների խորացման համար:
Պետքարտուղար կարդինալի հետ հանդիպումից հետո ՀՀ ղեկավարը Վատիկանում այցելել է Սուրբ Պետրոս Մայր տաճար:
Այցի առաջին օրը ՀՀ նախագահն այցելել է նաև Հռոմի Սուրբ Նիկողայոս hայ կաթոլիկ եկեղեցի: